ਭੁਨਰਹੇੜੀ, 1 ਅਕਤੂਬਰ – ਨਿਊਜ਼ਲਾਈਨ ਐਕਸਪ੍ਰੈਸ – ਪੰਜਾਬ ਭਰ ‘ਚ ਪੰਚਾਇਤੀ ਚੋਣਾਂ ਨੂੰ ਲੈਕੇ ਮਾਹੌਲ ਭਖਿਆ ਹੋਇਆ ਹੈ। ਹਰ ਕੋਈ ਆਪਣੀ ਜਿੱਤ ਦੇ ਦਾਅਵੇ ਠੋਕ ਰਿਹਾ ਹੈ। ਕੋਈ ਸਰਪੰਚੀ ਲਈ 2 ਕਰੋੜ ਦੀ ਬੋਲੀ ਲਗਾ ਰਿਹਾ ਹੈ ਤੇ ਕੋਈ 60 ਲੱਖ ਦੀ। ਹਾਲਾਂਕਿ ਇਹ ਮਾਮਲਾ ਹਾਈਕੋਰਟ ਪਹੁੰਚ ਚੁੱਕਿਆ ਹੈ, ਇਸ ਵਿਚਾਲੇ ਪਟਿਆਲਾ ਦੇ ਪਿੰਡ ਭੁਨਰਹੇੜੀ ਦੇ ਬੀਡੀਪੀਓ ਦਫਤਰ ‘ਚ ਨਾਮਜ਼ਦਗੀ ਮੌਕੇ ਹੰਗਾਮਾ ਹੋ ਗਿਆ ਹੈ। ਇਸ ਦੌਰਾਨ ਸਰਪੰਚੀ ਦੇ ਉਮੀਦਵਾਰ ਵੱਲੋਂ ਬੀਡੀਪੀਓ ‘ਤੇ ਕੰਮ ਨਾ ਕਰਨ ਦਾ ਦੋਸ਼ ਲਗਾਇਆ ਅਤੇ ਦਫਤਰ ਦੇ ਬਾਹਰ ਰੌਲਾ ਪਾਉਣਾ ਸ਼ੁਰੂ ਕਰ ਦਿੱਤਾ ਜਿਸਦੇ ਜਵਾਬ ‘ਚ ਬੀਡੀਪੀਓ ਨੇ ਤੈਸ਼ ‘ਚ ਆ ਕੇ ਉਮੀਦਵਾਰ ਨੂੰ ਥਾਣੇ ‘ਚ ਡੱਕ ਦੇਣ ਦੀ ਧਮਕੀ ਦਿੱਤੀ।
ਇਸ ਦੌਰਾਨ ਦੋਵਾਂ ਵਲੋਂ ਇਕ-ਦੂਜੇ ਲਈ ਮੰਦੀ ਸ਼ਬਦਾਵਲੀ ਵੀ ਵਰਤੀ ਗਈ। ਮਾਮਲਾ ਬੀਤੇ ਕੱਲ੍ਹ ਦਾ ਦੱਸਿਆ ਜਾ ਰਿਹਾ ਹੈ ਜਿਸਦੀ ਵੀਡਿਓ ਹੁਣ ਵਾਇਰਲ ਹੋ ਰਹੀ ਹੈ।
ਸੂਤਰਾਂ ਅਨੁਸਾਰ ਪਿੰਡ ਜਲਵੇੜਾ ਦਾ ਇਕ ਵਿਅਕਤੀ ਐਨਓਸੀ ਲੈਣ ਦੇ ਸਬੰਧ ‘ਚ ਦਫਤਰ ਆਇਆ ਸੀ ਪਰ ਇਥੇ ਕੰਮ ‘ਚ ਦੇਰੀ ਹੋਣ ਕਰਕੇ ਰੌਲਾ ਸ਼ੁਰੂ ਹੋਇਆ ਸੀ। ਦੇਖਦੇ-ਦੇਖਦੇ ਬੀਡੀਪੀਓ ਵੀ ਰੌਲਾ ਪਾਉਣ ਵਾਲੇ ਵਿਅਕਤੀ ਨੂੰ ਸਿੱਧਾ ਹੋ ਗਿਆ।
ਇਸ ਮਾਮਲੇ ਬਾਰੇ ਬੀਡੀਪੀਓ ਬਲਾਕ ਭੁਨਰਹੇੜੀ ਮੋਹਿੰਦਰਜੀਤ ਸਿੰਘ ਦਾ ਕਹਿਣਾ ਹੈ ਕਿ ਵਿਅਕਤੀ ਰੌਲਾ ਪਾਉਂਦਾ ਦਫਤਰ ‘ਚ ਆਇਆ ਤੇ ਸਰਕਾਰੀ ਕਾਗਜ਼ ਖਿਲਾਰ ਕੇ ਮਾੜਾ ਬੋਲਣਾ ਸ਼ੁਰੂ ਕਰ ਦਿੱਤਾ। ਬੀਡੀਪੀਓ ਅਨੁਸਾਰ ਇਸ ਵਿਅਕਤੀ ਨੂੰ ਸਮਝਾਉਣ ਦੀ ਬਹੁਤ ਕੋਸ਼ਿਸ਼ ਕੀਤੀ ਪਰ ਹੰਗਾਮਾ ਕਰਦਿਆਂ ਜਾਣਬੁੱਝ ਕੇ ਸਰਕਾਰੀ ਕੰਮ ‘ਚ ਵਿਗਨ ਪਾਇਆ, ਇਸ ਬਾਰੇ ਪੁਲਸ ਨੂੰ ਸ਼ਿਕਾਇਤ ਕੀਤੀ ਗਈ ਹੈ।
