🚩 “ਸਾਜ਼ ਔਰ ਆਵਾਜ਼ ਕਲੱਬ” ਦੇ ਸੁਰਾਂ ਦੀ ਰੌਣਕ ਨਾਲ ਗੂੰਜੇਗਾ ਐੱਨਜ਼ੈੱਡਸੀਸੀ ਆਡੀਟੋਰੀਅਮ; 16 ਅਗਸਤ ਨੂੰ ਹੋਵੇਗਾ ਵਿਸ਼ਾਲ ਸੰਗੀਤਕ ਸਮਾਗਮ

🚩 “ਸਾਜ਼ ਔਰ ਆਵਾਜ਼ ਕਲੱਬ” ਦੇ ਸੁਰਾਂ ਦੀ ਰੌਣਕ ਨਾਲ ਗੂੰਜੇਗਾ ਐੱਨਜ਼ੈੱਡਸੀਸੀ ਆਡੀਟੋਰੀਅਮ; 16 ਅਗਸਤ ਨੂੰ ਹੋਵੇਗਾ ਵਿਸ਼ਾਲ ਸੰਗੀਤਕ ਸਮਾਗਮ

ਪਟਿਆਲਾ, 11 ਜੁਲਾਈ: ਨਿਊਜ਼ਲਾਈਨ ਐਕਸਪ੍ਰੈਸ –        ਪਟਿਆਲਾ ਦੀ ਅਮੀਰ ਸੰਗੀਤਕ ਵਿਰਾਸਤ ਨੂੰ ਨਵਾਂ ਆਯਾਮ ਦੇਣ ਲਈ 16 ਅਗਸਤ ਨੂੰ ਨਾਰਥ ਜ਼ੋਨ ਕਲਚਰਲ ਸੈਂਟਰ (ਐੱਨਜ਼ੈੱਡਸੀਸੀ) ਦੇ ਆਡੀਟੋਰੀਅਮ ਵਿੱਚ ਇੱਕ ਵਿਸ਼ਾਲ ਅਤੇ ਸ਼ਾਨਦਾਰ ਸੰਗੀਤਕ ਸਮਾਗਮ ਕਰਵਾਇਆ ਜਾਵੇਗਾ। ਪਟਿਆਲਾ ਹੀ ਨਹੀਂ, ਸਗੋਂ ਉੱਤਰੀ ਭਾਰਤ ਵਿੱਚ ਆਪਣੀ ਵੱਖਰੀ ਪਛਾਣ ਬਣਾ ਚੁੱਕੇ ਸਾਜ਼ ਔਰ ਆਵਾਜ਼ ਕਲੱਬ ਦੇ ਸਹਿਯੋਗ ਨਾਲ ਹੋਣ ਵਾਲੇ ਇਸ ਸਮਾਗਮ ਨੂੰ ਹੋਰ ਵਧੀਆ ਬਣਾਉਣ ਲਈ ਮੀਟਿੰਗ ਕੀਤੀ ਗਈ।
ਸਮਾਗਮ ਦੀਆਂ ਤਿਆਰੀਆਂ ਨੂੰ ਲੈ ਕੇ ਆਫ਼ਿਸਰਜ਼ ਕਲੱਬ, ਪਟਿਆਲਾ ਵਿਖੇ ਹੋਈ ਵਿਸ਼ੇਸ਼ ਮੀਟਿੰਗ ਵਿੱਚ ਪ੍ਰਬੰਧਾਂ ਅਤੇ ਰੂਪ-ਰੇਖਾ ਬਾਰੇ ਵਿਸਥਾਰ ਨਾਲ ਵਿਚਾਰ-ਵਟਾਂਦਰਾ ਕੀਤਾ ਗਿਆ। ਕਲੱਬ ਦੇ ਪ੍ਰਧਾਨ ਰਵਿੰਦਰ ਕੁਮਾਰ ਬਾਲੀ ਦੇ ਨਿਰਦੇਸ਼ਾਂ ਅਨੁਸਾਰ ਹੋਈ ਮੀਟਿੰਗ ਦੀ ਅਗਵਾਈ ਸੀਨੀਅਰ ਮੀਤ ਪ੍ਰਧਾਨ ਕੇ. ਐੱਸ. ਸੇਖੋਂ ਅਤੇ ਜਨਰਲ ਸਕੱਤਰ ਰਾਜ ਕੁਮਾਰ ਨੇ ਕੀਤੀ।
ਮੀਟਿੰਗ ਵਿੱਚ ਫਾਇਨਾਂਸ ਸਕੱਤਰ ਅਸ਼ੋਕ ਧੀਮਾਨ, ਗੁਲਸ਼ਨ ਸ਼ਰਮਾ, ਰਸਦੀਪ ਸਿੰਘ, ਗੌਤਮ ਬੱਗਾ, ਲਲਿਤ ਛਾਬੜਾ, ਸੁਮਨ ਖੱਤਰੀ, ਬੱਬਲ ਅਰੋੜਾ ਅਤੇ ਹੋਰ ਅਹੁਦੇਦਾਰਾਂ ਨੇ ਸ਼ਮੂਲੀਅਤ ਕਰਦਿਆਂ ਸਮਾਗਮ ਨੂੰ ਹਰ ਪੱਖੋਂ ਸਫ਼ਲ ਅਤੇ ਯਾਦਗਾਰ ਬਣਾਉਣ ਲਈ ਆਪਣੇ ਸੁਝਾਅ ਦਿੱਤੇ। ਵਿਚਾਰ-ਚਰਚਾ ਦੌਰਾਨ ਸਟੇਜ ਪ੍ਰਬੰਧ, ਕਲਾਕਾਰਾਂ ਦੀ ਚੋਣ, ਤਕਨੀਕੀ ਵਿਵਸਥਾਵਾਂ ਅਤੇ ਦਰਸ਼ਕਾਂ ਲਈ ਬਿਹਤਰ ਪ੍ਰਬੰਧਾਂ ਨੂੰ ਅੰਤਿਮ ਰੂਪ ਦੇਣ ‘ਤੇ ਵੀ ਜ਼ੋਰ ਦਿੱਤਾ ਗਿਆ।
ਕਲੱਬ ਦੇ ਅਹੁਦੇਦਾਰਾਂ ਨੇ ਕਿਹਾ ਕਿ ਸਾਜ਼ ਔਰ ਆਵਾਜ਼ ਕਲੱਬ ਨੇ ਆਪਣੇ ਮਿਆਰੀ ਸੰਗੀਤਕ ਪ੍ਰੋਗਰਾਮਾਂ ਰਾਹੀਂ ਪਟਿਆਲਾ ਨੂੰ ਇੱਕ ਵੱਖਰੀ ਸੰਗੀਤਕ ਪਛਾਣ ਦਿੱਤੀ ਹੈ। ਹਰ ਸਮਾਗਮ ਦੀ ਤਰ੍ਹਾਂ ਇਸ ਵਾਰ ਵੀ ਪ੍ਰਸਿੱਧ ਗਾਇਕਾਂ ਅਤੇ ਪ੍ਰਤਿਭਾਸ਼ਾਲੀ ਕਲਾਕਾਰਾਂ ਦੀਆਂ ਪੇਸ਼ਕਾਰੀਆਂ ਦਰਸ਼ਕਾਂ ਲਈ ਖਾਸ ਖਿੱਚ ਦਾ ਕੇਂਦਰ ਹੋਣਗੀਆਂ।
ਮੀਟਿੰਗ ਦੌਰਾਨ ਇਹ ਵੀ ਫ਼ੈਸਲਾ ਕੀਤਾ ਗਿਆ ਕਿ 16 ਅਗਸਤ ਨੂੰ ਹੋਣ ਵਾਲੇ ਇਸ ਵਿਸ਼ੇਸ਼ ਸੰਗੀਤਕ ਸਮਾਗਮ ਦੇ ਆਯੋਜਕਾਂ ਅਤੇ ਰੂਪ-ਰੇਖਾ ਦਾ ਰਸਮੀ ਐਲਾਨ 12 ਜੁਲਾਈ ਨੂੰ ਸਾਜ਼ ਔਰ ਆਵਾਜ਼ ਕਲੱਬ ਦੇ ਫੈਮਿਲੀ ਪ੍ਰੋਗਰਾਮ ਦੌਰਾਨ ਕੀਤਾ ਜਾਵੇਗਾ। ਕਲੱਬ ਦਾ ਮੰਨਣਾ ਹੈ ਕਿ ਅਜਿਹੇ ਉਪਰਾਲੇ ਨਾ ਸਿਰਫ਼ ਪਟਿਆਲਾ ਦੀ ਸੱਭਿਆਚਾਰਕ ਵਿਰਾਸਤ ਨੂੰ ਮਜ਼ਬੂਤ ਕਰਦੇ ਹਨ, ਸਗੋਂ ਨਵੀਂ ਪੀੜ੍ਹੀ ਨੂੰ ਵੀ ਸੰਗੀਤ ਨਾਲ ਜੋੜਨ ਵਿੱਚ ਅਹਿਮ ਭੂਮਿਕਾ ਨਿਭਾਉਂਦੇ ਹਨ।

Newsline Express

Author: Newslineexpres@1