🚩 ਚੰਡੀਗੜ੍ਹ ’ਚ ਕੈਬ ਤੇ ਬਾਈਕ-ਟੈਕਸੀ ਸੇਵਾਵਾਂ ’ਤੇ ਰੋਕ; Uber-Rapido ਦੇ ਲਾਇਸੈਂਸ 6 ਮਹੀਨਿਆਂ ਲਈ ਮੁਅੱਤਲ

🚩 Uber-Rapido ਦੇ ਲਾਇਸੈਂਸ 6 ਮਹੀਨਿਆਂ ਲਈ ਮੁਅੱਤਲ

🚩 ਚੰਡੀਗੜ੍ਹ ’ਚ ਕੈਬ ਤੇ ਬਾਈਕ-ਟੈਕਸੀ ਸੇਵਾਵਾਂ ’ਤੇ ਰੋਕ, ਯਾਤਰੀਆਂ ਲਈ ਵਧੀਆਂ ਮੁਸ਼ਕਲਾਂ

ਚੰਡੀਗੜ੍ਹ, 9 ਸਤੰਬਰ: ਨਿਊਜ਼ਲਾਈਨ ਐਕਸਪ੍ਰੈਸ –       ਚੰਡੀਗੜ੍ਹ ਪ੍ਰਸ਼ਾਸਨ ਨੇ ਐਪ-ਆਧਾਰਿਤ ਕੈਬ ਅਤੇ ਬਾਈਕ-ਟੈਕਸੀ ਸੇਵਾਵਾਂ ਦੇਣ ਵਾਲੀਆਂ ਉਬਰ ਅਤੇ ਰੈਪਿਡੋ ਖ਼ਿਲਾਫ਼ ਸਖ਼ਤ ਕਾਰਵਾਈ ਕੀਤੀ ਹੈ। ਰਾਜ ਟਰਾਂਸਪੋਰਟ ਅਥਾਰਟੀ ਨੇ ਦੋਵਾਂ ਕੰਪਨੀਆਂ ਦੇ ਐਗਰੀਗੇਟਰ ਲਾਇਸੈਂਸ ਤੁਰੰਤ ਪ੍ਰਭਾਵ ਨਾਲ ਛੇ ਮਹੀਨਿਆਂ ਲਈ ਮੁਅੱਤਲ ਕਰ ਦਿੱਤੇ ਹਨ। ਇਸ ਕਾਰਨ ਮਾਰਚ 2027 ਤੱਕ ਚੰਡੀਗੜ੍ਹ ਵਿੱਚ ਉਬਰ ਅਤੇ ਰੈਪਿਡੋ ਰਾਹੀਂ ਕੈਬ ਤੇ ਬਾਈਕ-ਟੈਕਸੀ ਸੇਵਾਵਾਂ ’ਤੇ ਰੋਕ ਰਹੇਗੀ।
ਪ੍ਰਸ਼ਾਸਨ ਮੁਤਾਬਕ ਦੋਵਾਂ ਕੰਪਨੀਆਂ ਨੂੰ ਮੋਟਰ ਵਹੀਕਲ ਐਗਰੀਗੇਟਰ ਰੂਲਜ਼, 2025 ਤਹਿਤ ਨਿਯਮਾਂ ਦੀ ਪਾਲਣਾ ਲਈ ਕਈ ਮੌਕੇ ਦਿੱਤੇ ਗਏ ਸਨ। ਡਰਾਈਵਰਾਂ ਦੀ ਸਿਹਤ ਤੇ ਟਰਮ ਇੰਸ਼ੋਰੈਂਸ, ਸਿਖਲਾਈ ਅਤੇ ਤੈਅ ਕਿਰਾਏ ਦੇ ਢਾਂਚੇ ਦੀ ਪਾਲਣਾ ਨਾ ਕਰਨ ਸਮੇਤ ਕਈ ਇਤਰਾਜ਼ ਸਾਹਮਣੇ ਆਏ। ਰੈਪਿਡੋ ਦੇ ਮਾਮਲੇ ਵਿੱਚ ਬਾਈਕ-ਟੈਕਸੀ ਚਾਲਕਾਂ ਦੇ ਬੀਮਾ ਕਵਰ ’ਤੇ ਵੀ ਸਵਾਲ ਉਠਾਏ ਗਏ ਹਨ। ਇਸ ਤੋਂ ਪਹਿਲਾਂ ਜੂਨ ਵਿੱਚ ਓਲਾ ਅਤੇ ਇਨਡ੍ਰਾਈਵ ਖ਼ਿਲਾਫ਼ ਵੀ ਕਾਰਵਾਈ ਹੋ ਚੁੱਕੀ ਹੈ। ਇਸ ਤਰ੍ਹਾਂ ਚੰਡੀਗੜ੍ਹ ਵਿੱਚ ਚਾਰੇ ਪ੍ਰਮੁੱਖ ਐਪ-ਆਧਾਰਿਤ ਕੈਬ ਐਗਰੀਗੇਟਰਾਂ ’ਤੇ ਕਾਰਵਾਈ ਹੋ ਗਈ ਹੈ। ਫਿਲਹਾਲ ‘ਭਾਰਤ ਟੈਕਸੀ’ ਇੱਕ ਪ੍ਰਮੁੱਖ ਉਪਲਬਧ ਪਲੇਟਫਾਰਮ ਹੈ। ਉਬਰ ਤੇ ਰੈਪਿਡੋ ’ਤੇ ਰੋਕ ਨਾਲ ਰੋਜ਼ਾਨਾ ਸਫ਼ਰ ਕਰਨ ਵਾਲੇ ਲੋਕਾਂ ਲਈ ਆਵਾਜਾਈ ਦੇ ਵਿਕਲਪ ਹੋਰ ਸੀਮਤ ਹੋਣ ਦੀ ਸੰਭਾਵਨਾ ਹੈ।

Newsline Express

Author: Newslineexpres@1