🚩 ਅਯੁੱਧਿਆ ਵਿੱਚ ਅੱਜ ਜਗਣਗੇ 30 ਲੱਖ ਤੋਂ ਵੱਧ ਦੀਵੇ, ਵਿਸ਼ਵ ਰਿਕਾਰਡ ਬਣਾਉਣ ਦੀ ਤਿਆਰੀ

🚩 ਅਯੁੱਧਿਆ ਵਿੱਚ ਅੱਜ ਜਗਣਗੇ 30 ਲੱਖ ਤੋਂ ਵੱਧ ਦੀਵੇ, ਵਿਸ਼ਵ ਰਿਕਾਰਡ ਬਣਾਉਣ ਦੀ ਤਿਆਰੀ
🚩 ਉਪ ਰਾਸ਼ਟਰਪਤੀ ਸੀ.ਪੀ. ਰਾਧਾਕ੍ਰਿਸ਼ਨਨ ਤੇ ਮੁੱਖ ਮੰਤਰੀ ਯੋਗੀ ਆਦਿੱਤਿਆਨਾਥ ਕਰਨਗੇ ਸ਼ਿਰਕਤ

ਅਯੁੱਧਿਆ, 7 ਨਵੰਬਰ : ਨਿਊਜ਼ਲਾਈਨ ਐਕਸਪ੍ਰੈਸ –         ਰਾਮਨਗਰੀ ਅਯੁੱਧਿਆ ਵਿੱਚ ਦਸਵੇਂ ਦੀਪਉਤਸਵ ਨੂੰ ਲੈ ਕੇ ਸਾਰੀਆਂ ਤਿਆਰੀਆਂ ਮੁਕੰਮਲ ਕਰ ਲਈਆਂ ਗਈਆਂ ਹਨ। ਸਰਯੂ ਨਦੀ ਦੇ ਕੰਢੇ ਸਥਿਤ 56 ਘਾਟਾਂ ‘ਤੇ 30 ਲੱਖ ਤੋਂ ਵੱਧ ਦੀਵੇ ਸਜਾਏ ਗਏ ਹਨ। ਇਨ੍ਹਾਂ ਨੂੰ ਇੱਕੋ ਸਮੇਂ ਜਗਾ ਕੇ ਨਵਾਂ ਵਿਸ਼ਵ ਰਿਕਾਰਡ ਬਣਾਉਣ ਦੀ ਤਿਆਰੀ ਹੈ। ਇਸ ਵਿਸ਼ਾਲ ਪ੍ਰਬੰਧ ਨੂੰ ਅਵਧ ਯੂਨੀਵਰਸਿਟੀ ਦੇ 35 ਹਜ਼ਾਰ ਵਲੰਟੀਅਰਾਂ ਨੇ ਤਿੰਨ ਦਿਨਾਂ ਦੀ ਮਿਹਨਤ ਨਾਲ ਪੂਰਾ ਕੀਤਾ ਹੈ।
ਦੀਪਉਤਸਵ ਦੇ ਮੁੱਖ ਸਮਾਗਮ ਵਿੱਚ ਉਪ ਰਾਸ਼ਟਰਪਤੀ ਸੀ.ਪੀ. ਰਾਧਾਕ੍ਰਿਸ਼ਨਨ ਅਤੇ ਉੱਤਰ ਪ੍ਰਦੇਸ਼ ਦੇ ਮੁੱਖ ਮੰਤਰੀ ਯੋਗੀ ਆਦਿੱਤਿਆਨਾਥ ਸ਼ਾਮਲ ਹੋਣਗੇ। ਇਸ ਮੌਕੇ ਰਾਮਕਥਾ ਪਾਰਕ ਵਿੱਚ ਸਥਾਪਤ ਵਿਸ਼ਾਲ ਰਾਮ ਦਰਬਾਰ ਵਿੱਚ ਭਗਵਾਨ ਸ਼੍ਰੀ ਰਾਮ ਦਾ ਰਾਜਤਿਲਕ ਕੀਤਾ ਜਾਵੇਗਾ। ਪਹਿਲੀ ਵਾਰ ਦੇਸ਼ ਦੇ ਉਪ ਰਾਸ਼ਟਰਪਤੀ ਅਯੁੱਧਿਆ ਦੇ ਇਸ ਵਿਸ਼ਾਲ ਦੀਪਉਤਸਵ ਦੇ ਗਵਾਹ ਬਣਨਗੇ। ਸਮਾਗਮ ਦੌਰਾਨ ਭਗਵਾਨ ਸ਼੍ਰੀ ਰਾਮ, ਮਾਤਾ ਸੀਤਾ ਅਤੇ ਲਕਸ਼ਮਣ ਦੇ ਅਯੁੱਧਿਆ ਪਰਤਣ ਦਾ ਦ੍ਰਿਸ਼ ਵੀ ਪੇਸ਼ ਕੀਤਾ ਜਾਵੇਗਾ। ਪੁਸ਼ਪਕ ਵਿਮਾਨ ਦੇ ਪ੍ਰਤੀਕ ਵਜੋਂ ਹੈਲੀਕਾਪਟਰ ਰਾਹੀਂ ਉਨ੍ਹਾਂ ਦੀ ਆਮਦ ਦਿਖਾਈ ਜਾਵੇਗੀ। ਇਸ ਤੋਂ ਬਾਅਦ ਭਰਤ ਮਿਲਾਪ ਅਤੇ ਫੁੱਲਾਂ ਦੀ ਵਰਖਾ ਸਮੇਤ ਧਾਰਮਿਕ ਝਾਕੀਆਂ ਪੇਸ਼ ਕੀਤੀਆਂ ਜਾਣਗੀਆਂ।

ਉੱਧਰ, ਰਾਮ ਜਨਮ ਭੂਮੀ ਕੰਪਲੈਕਸ ਵਿੱਚ ਵੀ ਵਿਸ਼ੇਸ਼ ਤਿਆਰੀਆਂ ਕੀਤੀਆਂ ਗਈਆਂ ਹਨ। ਰਾਮ ਮੰਦਰ ਸਮੇਤ ਕੰਪਲੈਕਸ ਦੇ ਸਾਰੇ 18 ਮੰਦਰਾਂ ਵਿੱਚ ਇੱਕ ਲੱਖ ਦੀਵੇ ਜਗਾਏ ਜਾਣਗੇ। ਇਸ ਲਈ 1500 ਕਰਮਚਾਰੀਆਂ ਦੀਆਂ ਡਿਊਟੀਆਂ ਲਗਾਈਆਂ ਗਈਆਂ ਹਨ। ਮੰਦਰ ਨੂੰ ਵਿਸ਼ੇਸ਼ ਰੌਸ਼ਨੀਆਂ ਨਾਲ ਸਜਾਇਆ ਗਿਆ ਹੈ ਅਤੇ ਰਾਮ ਲੱਲਾ ਲਈ ਵਿਸ਼ੇਸ਼ ਭੇਟਾਂ ਦੀ ਤਿਆਰੀ ਕੀਤੀ ਗਈ ਹੈ।
ਇਸ ਸਾਲ ਦੀਪਉਤਸਵ ਦਾ ਮੁੱਖ ਥੀਮ ‘ਨਵੇਂ ਭਾਰਤ ਦਾ ਨਵਾਂ ਅਯੁੱਧਿਆ’ ਰੱਖਿਆ ਗਿਆ ਹੈ। ਧਰਮਪਥ ‘ਤੇ 50 ਡਿਜੀਟਲ ਥੰਮ੍ਹ ਲਗਾਏ ਗਏ ਹਨ, ਜਿਨ੍ਹਾਂ ਰਾਹੀਂ ਰਾਮਾਇਣ ਦੇ ਦ੍ਰਿਸ਼ ਅਤੇ ਡਿਜੀਟਲ ਲਾਈਟ ਸ਼ੋਅ ਦਿਖਾਏ ਜਾਣਗੇ। ਹਨੂੰਮਾਨਗੜ੍ਹੀ, ਬਿਰਲਾ ਮੰਦਰ, ਰਾਮਕਥਾ ਪਾਰਕ ਅਤੇ ਸਰਯੂ ਪੁਲ ਸਮੇਤ ਪ੍ਰਮੁੱਖ ਸਥਾਨਾਂ ਨੂੰ ਵੀ ਰੰਗ-ਬਿਰੰਗੀਆਂ ਰੌਸ਼ਨੀਆਂ ਨਾਲ ਸਜਾਇਆ ਗਿਆ ਹੈ।

Newsline Express

Author: Newslineexpres@1