ਪਟਿਆਲਾ, 27 ਅਗਸਤ : ਨਿਊਜ਼ਲਾਈਨ ਐਕਸਪ੍ਰੈਸ ਬਿਊਰੋ – ਗੁਰੂ ਨਾਨਕ ਨਗਰ ਗਲੀ ਨੰਬਰ 18 ‘ਚ ਆਟੋ ਖੜ੍ਹਾ ਕਰਨ ਨੂੰ ਲੈ ਕੇ ਆਟੋ ਚਾਲਕ ਤੇ ਇਲਾਕਾ ਵਾਸੀਆਂ ਵਿਚਕਾਰ ਤਕਰਾਰ ਹੋ ਗਈ। ਇਸ ਦੌਰਾਨ ਆਟੋ ਚਾਲਕ ਨੇ ਕੁਹਾੜੀ ਚੁੱਕ ਕੇ ਕਈਆਂ ‘ਤੇ ਵਾਰ ਕਰਨ ਦੀ ਵੀ ਕੋਸ਼ਿਸ਼ ਕੀਤੀ। ਮਾਮਲਾ ਭਖ਼ਦਾ ਦੇਖ ਕੇ ਪੁਲਿਸ ਵੀ ਮੌਕੇ ‘ਤੇ ਪੁੱਜ ਗਈ ਪਰ ਆਟੋ ਚਾਲਕ ਕੁਹਾੜੀ ਲਹਿਰਾਉਂਦਾ ਹੋਇਆ ਰਾਜਪੁਰਾ ਰੋਡ ਤਕ ਪੁੱਜ ਗਿਆ। ਕਾਫ਼ੀ ਸਮਾਂ ਹੰਗਾਮਾ ਕਰਨ ਤੋਂ ਬਾਅਦ ਪੁਲਿਸ ਨੇ ਲੋਕਾਂ ਦੀ ਮਦਦ ਨਾਲ ਆਟੋ ਚਾਲਕ ਤੋਂ ਕੁਹਾੜੀ ਖੋਹ ਕੇ ਉਸ ਨੂੰ ਰੱਸੀਆਂ ਨਾਲ ਬੰਨ੍ਹ ਲਿਆ।
ਮੌਕੇ ਤੇ ਮੌਜੂਦ ਥਾਣਾ ਲਾਹੌਰੀ ਗੇਟ ਮੁਖੀ ਮਹਿਲ ਸਿੰਘ ਨੇ ਨਿਊਜ਼ਲਾਈਨ ਐਕਸਪ੍ਰੈਸ ਨਾਲ ਗੱਲਬਾਤ ਕਰਦੇ ਦੱਸਿਆ ਕਿ ਗਲੀ ਵਿਚ ਆਟੋ ਨੂੰ ਖੜ੍ਹਾ ਕਰਨ ਨੂੰ ਲੈ ਕੇ ਚਾਲਕ ਅਤੇ ਆਸ ਪਾਸ ਦੇ ਲੋਕਾਂ ਵਿਚ ਤਕਰਾਰ ਹੋਈ ਸੀ ਪ੍ਰੰਤੂ ਆਟੋ ਚਾਲਕ ਸੁਖਵਿੰਦਰ ਸਿੰਘ ਨੇ ਕਈਆਂ ਤੇ ਜਾਨਲੇਵਾ ਹਮਲਾ ਕੀਤਾ ਹੈ। ਇਸ ਸਬੰਧੀ ਥਾਣਾ ਅਰਬਨ ਅਸਟੇਟ ਪੁਲਿਸ ਨੇ ਅਗਲੀ ਕਾਰਵਾਈ ਸ਼ੁਰੂ ਕਰ ਦਿੱਤੀ ਹੈ।
