🚩 ਵੇਰਕਾ ਮਿਲਕ ਪਲਾਂਟ ਤੋਂ 150 ਠੇਕਾ ਕਰਮਚਾਰੀਆਂ ਨੂੰ ਨੌਕਰੀ ਤੋਂ ਕੱਢਿਆ; ਪੱਕੀ ਨੌਕਰੀ ਦੀ ਮੰਗ ‘ਤੇ ਭੜਕਿਆ ਵਿਵਾਦ

🚩 ਵੇਰਕਾ ਮਿਲਕ ਪਲਾਂਟ ਤੋਂ 150 ਠੇਕਾ ਕਰਮਚਾਰੀਆਂ ਨੂੰ ਨੌਕਰੀ ਤੋਂ ਕੱਢਿਆ; ਪੱਕੀ ਨੌਕਰੀ ਦੀ ਮੰਗ ‘ਤੇ ਭੜਕਿਆ ਵਿਵਾਦ

ਪਟਿਆਲਾ, 22 ਮਈ – ਨਿਊਜ਼ਲਾਈਨ ਐਕਸਪ੍ਰੈਸ –          ਪਟਿਆਲਾ ਦੇ ਵੇਰਕਾ ਮਿਲਕ ਪਲਾਂਟ ਵਿੱਚ ਕੰਮ ਕਰ ਰਹੇ ਕਰੀਬ 150 ਠੇਕਾ ਕਰਮਚਾਰੀਆਂ ਨੂੰ ਨੌਕਰੀ ਤੋਂ ਹਟਾਏ ਜਾਣ ਮਗਰੋਂ ਵੱਡਾ ਵਿਵਾਦ ਖੜ੍ਹਾ ਹੋ ਗਿਆ ਹੈ। ਕਰਮਚਾਰੀਆਂ ਦਾ ਦੋਸ਼ ਹੈ ਕਿ ਉਹ ਪੱਕੀ ਨੌਕਰੀ ਦੀ ਮੰਗ ਨੂੰ ਲੈ ਕੇ ਮੋਹਾਲੀ ਸਥਿਤ ਵੇਰਕਾ ਹੈੱਡ ਆਫਿਸ ਅੱਗੇ ਧਰਨਾ ਦੇ ਰਹੇ ਸਨ, ਜਿਸ ਕਾਰਨ ਪ੍ਰਸ਼ਾਸਨ ਨੇ ਉਨ੍ਹਾਂ ਨੂੰ ਸਜ਼ਾ ਵਜੋਂ ਨੌਕਰੀ ਤੋਂ ਕੱਢ ਦਿੱਤਾ।ਮੁਲਾਜ਼ਮਾਂ ਨੇ ਦੱਸਿਆ ਕਿ ਜਦੋਂ ਉਹ ਸਵੇਰੇ ਡਿਊਟੀ ਲਈ ਪਲਾਂਟ ਪਹੁੰਚੇ ਤਾਂ ਉਨ੍ਹਾਂ ਨੂੰ ਅੰਦਰ ਜਾਣ ਤੋਂ ਰੋਕ ਦਿੱਤਾ ਗਿਆ। ਇਸ ਦੇ ਵਿਰੋਧ ਵਿੱਚ ਕਰਮਚਾਰੀਆਂ ਨੇ ਸਰਹੰਦ ਰੋਡ ‘ਤੇ ਧਰਨਾ ਲਗਾ ਕੇ ਜਾਮ ਕਰ ਦਿੱਤਾ। ਤਪਦੀ ਗਰਮੀ ਦੇ ਬਾਵਜੂਦ ਔਰਤਾਂ ਸਮੇਤ ਕਈ ਕਰਮਚਾਰੀ ਸੜਕ ‘ਤੇ ਡਟੇ ਰਹੇ ਅਤੇ ਨੌਕਰੀ ਵਾਪਸ ਕਰਨ ਦੀ ਮੰਗ ਕਰਦੇ ਰਹੇ।

ਦੂਜੇ ਪਾਸੇ ਵੇਰਕਾ ਪ੍ਰਸ਼ਾਸਨ ਨੇ ਆਪਣੇ ਫੈਸਲੇ ਨੂੰ ਜਾਇਜ਼ ਕਰਾਰ ਦਿੱਤਾ ਹੈ। ਪਟਿਆਲਾ ਪਲਾਂਟ ਦੇ ਜੀਐਮ ਡਾ. ਅਮਿਤ ਮੁਤਾਬਕ ਕਰਮਚਾਰੀਆਂ ਨੂੰ ਪਹਿਲਾਂ ਹੀ ਕਿਹਾ ਗਿਆ ਸੀ ਕਿ ਕੁਝ ਲੋਕ ਧਰਨੇ ‘ਤੇ ਜਾਣ ਅਤੇ ਬਾਕੀ ਡਿਊਟੀ ਕਰਦੇ ਰਹਿਣ ਤਾਂ ਜੋ ਕਿਸਾਨਾਂ ਦੇ ਦੁੱਧ ਦਾ ਨੁਕਸਾਨ ਨਾ ਹੋਵੇ। ਉਨ੍ਹਾਂ ਦੱਸਿਆ ਕਿ ਕਰਮਚਾਰੀਆਂ ਵੱਲੋਂ ਕੰਮ ਨਾ ਕਰਨ ਕਾਰਨ ਪ੍ਰਬੰਧਨ ਨੂੰ ਬਾਹਰੋਂ ਲੇਬਰ ਮੰਗਵਾਉਣੀ ਪਈ। ਪ੍ਰਸ਼ਾਸਨ ਦਾ ਕਹਿਣਾ ਹੈ ਕਿ ਕਰਮਚਾਰੀਆਂ ਨੂੰ ਵਟਸਐਪ ਅਤੇ ਫੋਨ ਰਾਹੀਂ ਪਹਿਲਾਂ ਹੀ ਸੂਚਿਤ ਕਰ ਦਿੱਤਾ ਗਿਆ ਸੀ ਕਿ ਹੁਣ ਉਨ੍ਹਾਂ ਦੀ ਸੇਵਾ ਦੀ ਲੋੜ ਨਹੀਂ ਰਹੀ। ਵੇਰਕਾ ਅਧਿਕਾਰੀਆਂ ਅਨੁਸਾਰ ਸੰਸਥਾ ਕਿਸਾਨਾਂ ਦੇ ਦੁੱਧ ਕਾਰੋਬਾਰ ਨਾਲ ਜੁੜੀ ਹੋਈ ਹੈ, ਇਸ ਲਈ ਕੰਮ ਵਿੱਚ ਰੁਕਾਵਟ ਕਾਰਨ ਵੱਡਾ ਨੁਕਸਾਨ ਹੋ ਸਕਦਾ ਸੀ।

Newsline Express

Author: Newslineexpres@1