🚩ਘਰ-ਘਰ ‘SIR’ ਦਾ ਕੰਮ ਕਰ ਰਹੇ ਬੀ.ਐਲ.ਓਜ਼ ਬੋਲੇ: “ਸੇਵਾ ਦੇ ਨਾਲ ਨਾਲ ਖ਼ਰਚਾ ਵੀ ਸਾਡਾ” ?….

🚩ਘਰ-ਘਰ ‘SIR’ ਦਾ ਕੰਮ ਕਰ ਰਹੇ ਬੀ.ਐਲ.ਓਜ਼ ਬੋਲੇ: “ਸੇਵਾ ਦੇ ਨਾਲ ਨਾਲ ਖ਼ਰਚਾ ਵੀ ਸਾਡਾ”

SIR ਮੁਹਿੰਮ ਵਿੱਚ ਬੀ.ਐਲ.ਓਜ਼ ਦੀ ਆਵਾਜ਼: “ਕੰਮ ਅਨੁਸਾਰ ਭੱਤਾ ਵੀ ਮਿਲੇ”

🚩ਜਨਗਣਨਾ ਅਤੇ ਡਰੱਗ ਸੈਂਸਸ/ਡਰੱਗ ਸਰਵੇ ਵਿੱਚ ਕੰਮ ਕਰਨ ਵਾਲੇ ਕਰਮਚਾਰੀਆਂ ਵਾਂਗ ਬੀ.ਐਲ.ਓਜ਼ ਨੂੰ ਵੀ ਮਿਲੇ ਵਾਧੂ ਭੱਤਾ

ਪਟਿਆਲਾ, 5 ਜੁਲਾਈ – ਨਿਊਜ਼ਲਾਈਨ ਐਕਸਪ੍ਰੈਸ –     ਪੰਜਾਬ ਵਿੱਚ ਚੱਲ ਰਹੀ ਸਪੈਸ਼ਲ ਇੰਟੈਂਸਿਵ ਰੀਵਿਜ਼ਨ (SIR) ਮੁਹਿੰਮ ਤਹਿਤ ਘਰ-ਘਰ ਜਾ ਕੇ ਵੋਟਰਾਂ ਦੀ ਤਸਦੀਕ ਅਤੇ ਫਾਰਮ ਇਕੱਠੇ ਕਰਨ ਦਾ ਕੰਮ ਕਰ ਰਹੇ ਬੂਥ ਲੈਵਲ ਅਫ਼ਸਰਾਂ ਨੇ ਮੁੱਖ ਚੋਣ ਅਧਿਕਾਰੀ ਪੰਜਾਬ ਕੋਲ ਯਾਤਰਾ ਭੱਤਾ, ਫੰਡ ਅਤੇ ਵਿਸ਼ੇਸ਼ ਇਨਸੈਂਟਿਵ ਦੇਣ ਦੀ ਮੰਗ ਕੀਤੀ ਹੈ।

ਬੀ.ਐਲ.ਓਜ਼ ਦਾ ਕਹਿਣਾ ਹੈ ਕਿ SIR ਮੁਹਿੰਮ ਦੌਰਾਨ ਉਨ੍ਹਾਂ ਨੂੰ ਹਰ ਰੋਜ਼ ਘਰ-ਘਰ ਜਾ ਕੇ ਸਰਵੇ ਕਰਨਾ ਪੈਂਦਾ ਹੈ, ਜਿਸ ਲਈ ਉਹ ਆਪਣੇ ਨਿੱਜੀ ਵਾਹਨਾਂ ਦੀ ਵਰਤੋਂ ਕਰ ਰਹੇ ਹਨ। ਪੈਟਰੋਲ, ਵਾਹਨਾਂ ਦੀ ਸੰਭਾਲ ਅਤੇ ਹੋਰ ਯਾਤਰਾ ਖ਼ਰਚੇ ਦਾ ਸਾਰਾ ਬੋਝ ਉਨ੍ਹਾਂ ਨੂੰ ਆਪਣੀ ਜੇਬ ਵਿੱਚੋਂ ਝੱਲਣਾ ਪੈ ਰਿਹਾ ਹੈ। ਭਾਵੇਂ ਵਿਭਾਗ ਵੱਲੋਂ ਕੰਮ ਲਈ ਇੱਕ ਕਿੱਟ ਮੁਹੱਈਆ ਕਰਵਾਈ ਗਈ ਹੈ, ਪਰ ਫੀਲਡ ਡਿਊਟੀ ਲਈ ਨਾ ਤਾਂ ਕੋਈ ਯਾਤਰਾ ਭੱਤਾ ਅਤੇ ਨਾ ਹੀ ਕੋਈ ਵੱਖਰਾ ਫੰਡ ਜਾਂ ਇਨਸੈਂਟਿਵ ਦਿੱਤਾ ਗਿਆ ਹੈ।

ਇਸ ਤੋਂ ਇਲਾਵਾ ਫਾਰਮਾਂ ਦੀ ਆਨਲਾਈਨ ਅਪਲੋਡਿੰਗ ਅਤੇ ਡਿਜ਼ਿਟਾਈਜ਼ੇਸ਼ਨ ਲਈ ਬੀ.ਐਲ.ਓਜ਼ ਆਪਣੇ ਨਿੱਜੀ ਮੋਬਾਈਲ ਫੋਨ, ਇੰਟਰਨੈੱਟ ਅਤੇ ਡਾਟਾ ਦੀ ਵਰਤੋਂ ਕਰ ਰਹੇ ਹਨ। ਕਰਮਚਾਰੀਆਂ ਦਾ ਕਹਿਣਾ ਹੈ ਕਿ ਇਸ ਕੰਮ ਲਈ ਕੋਈ ਟੈਬ ਜਾਂ ਹੋਰ ਡਿਜ਼ਿਟਲ ਸਾਧਨ ਵੀ ਉਪਲਬਧ ਨਹੀਂ ਕਰਵਾਏ ਗਏ।

ਬੀ.ਐਲ.ਓਜ਼ ਨੇ ਦਲੀਲ ਦਿੱਤੀ ਕਿ ਪਹਿਲਾਂ ਹੋਈ ਜਨਗਣਨਾ ਦੌਰਾਨ ਡਿਊਟੀ ਨਿਭਾਉਣ ਵਾਲੇ ਕਰਮਚਾਰੀਆਂ ਨੂੰ ਵੱਖਰਾ ਮਾਣਭੱਤਾ ਦਿੱਤਾ ਗਿਆ ਸੀ, ਜਦਕਿ ਡਰੱਗ ਸੈਂਸਸ/ਡਰੱਗ ਸਰਵੇ ਵਿੱਚ ਕੰਮ ਕਰਨ ਵਾਲੇ ਕਰਮਚਾਰੀਆਂ ਨੂੰ ਪ੍ਰਤੀ ਘਰ ਦੇ ਹਿਸਾਬ ਨਾਲ ਭੁਗਤਾਨ ਕੀਤਾ ਗਿਆ। ਇਸ ਦੇ ਉਲਟ SIR ਵਰਗੇ ਅਹਿਮ ਚੋਣੀ ਕੰਮ ਵਿੱਚ ਦਿਨ-ਰਾਤ ਮੈਦਾਨੀ ਡਿਊਟੀ ਕਰਨ ਦੇ ਬਾਵਜੂਦ ਬੀ.ਐਲ.ਓ ਨੂੰ ਕੋਈ ਵੱਖਰਾ ਫੰਡ ਜਾਂ ਇਨਸੈਂਟਿਵ ਨਹੀਂ ਮਿਲ ਰਿਹਾ।

ਹੁਣ ਲੋੜ ਹੈ ਕਿ SIR ਮੁਹਿੰਮ ਨੂੰ ਪ੍ਰਭਾਵਸ਼ਾਲੀ ਅਤੇ ਸਮੇਂ ਸਿਰ ਮੁਕੰਮਲ ਕਰਵਾਉਣ ਲਈ ਬੀ.ਐਲ.ਓਜ਼ ਨੂੰ ਯਾਤਰਾ ਭੱਤਾ, ਵਿਸ਼ੇਸ਼ ਇਨਸੈਂਟਿਵ, ਫੀਲਡ ਖ਼ਰਚ ਅਤੇ ਲੋੜੀਂਦੇ ਡਿਜ਼ਿਟਲ ਸਾਧਨ ਮੁਹੱਈਆ ਕਰਵਾਏ ਜਾਣ, ਤਾਂ ਜੋ ਉਹ ਬਿਨਾਂ ਵਿੱਤੀ ਬੋਝ ਦੇ ਆਪਣੀ ਡਿਊਟੀ ਨਿਭਾ ਸਕਣ।

ਉਮੀਦ ਹੈ ਕਿ ਸਰਕਾਰ ਅਤੇ ਮੁੱਖ ਚੋਣ ਅਧਿਕਾਰੀ ਪੰਜਾਬ ਬੀ.ਐਲ.ਓਜ਼ ਦੀਆਂ ਜਾਇਜ਼ ਮੰਗਾਂ ‘ਤੇ ਜਲਦ ਗੌਰ ਕਰਦੇ ਹੋਏ ਢੁੱਕਵਾਂ ਫ਼ੈਸਲਾ ਲੈਣ।    Newsline Express