🚩 ਲੁਧਿਆਣਾ ’ਚ ਜੈਮ-ਸੌਸ ਫੈਕਟਰੀ ’ਤੇ ਛਾਪੇਮਾਰੀ; ਗੰਦਗੀ ਦੇਖ ਫੂਡ ਸੇਫਟੀ ਟੀਮ ਦੇ ਉੱਡੇ ਹੋਸ਼

🚩 ਲੁਧਿਆਣਾ ’ਚ ਜੈਮ-ਸੌਸ ਫੈਕਟਰੀ ’ਤੇ ਸਿਹਤ ਵਿਭਾਗ ਦੀ ਛਾਪੇਮਾਰੀ

🚩 ਗੰਦਗੀ ਦੇਖ ਅਧਿਕਾਰੀ ਵੀ ਹੈਰਾਨ, ਸੌਸ-ਮੁਰੱਬੇ ਤੇ ਸਿਰਕੇ ਦੇ ਸੈਂਪਲ ਭਰੇ

ਲੁਧਿਆਣਾ, 10 ਸਤੰਬਰ – ਨਿਊਜ਼ਲਾਈਨ ਐਕਸਪ੍ਰੈਸ  –          ਜਲੰਧਰ ਬਾਈਪਾਸ ਨੇੜੇ ਨਿਊ ਅਸ਼ੋਕ ਨਗਰ ਇਲਾਕੇ ਵਿੱਚ ਸਿਹਤ ਵਿਭਾਗ ਦੀ ਫੂਡ ਸੇਫਟੀ ਟੀਮ ਨੇ ਸਿਰਕਾ, ਸੌਸ ਅਤੇ ਜੈਮ ਬਣਾਉਣ ਵਾਲੀ ਇੱਕ ਫੈਕਟਰੀ ’ਤੇ ਛਾਪੇਮਾਰੀ ਕੀਤੀ। ਭੋਜਨ ਉਤਪਾਦਾਂ ਦੀ ਗੁਣਵੱਤਾ ਅਤੇ ਸਫਾਈ ਸਬੰਧੀ ਮਿਲੀਆਂ ਸ਼ਿਕਾਇਤਾਂ ਦੇ ਆਧਾਰ ’ਤੇ ਕੀਤੀ ਗਈ। ਇਸ ਕਾਰਵਾਈ ਦੌਰਾਨ ਫੈਕਟਰੀ ਅੰਦਰ ਸਫਾਈ ਦੇ ਮਿਆਰਾਂ ਸਬੰਧੀ ਕਈ ਸਵਾਲ ਖੜ੍ਹੇ ਹੋਏ। ਜਾਂਚ ਦੌਰਾਨ ਟੀਮ ਨੇ ਸੌਸ, ਮੁਰੱਬੇ ਅਤੇ ਸਿਰਕੇ ਦੇ ਸੈਂਪਲ ਭਰੇ, ਜਿਨ੍ਹਾਂ ਨੂੰ ਜਾਂਚ ਲਈ ਭੇਜਿਆ ਗਿਆ ਹੈ। ਅਧਿਕਾਰੀਆਂ ਮੁਤਾਬਕ ਫੈਕਟਰੀ ਵਿੱਚ ਕਰੀਬ 200 ਡੱਬੇ ਸੌਸ, 25 ਡਰੰਮ ਅਤੇ ਲਗਭਗ 1000 ਕਿਲੋਗ੍ਰਾਮ ਮੁਰੱਬਾ ਮਿਲਿਆ। ਇਸ ਤੋਂ ਇਲਾਵਾ ਸਿਰਕੇ ਦੇ ਵੀ ਕਈ ਡੱਬੇ ਮੌਕੇ ’ਤੇ ਮੌਜੂਦ ਸਨ।
ਸਿਹਤ ਵਿਭਾਗ ਦੇ ਅਧਿਕਾਰੀ ਡਾ. ਅਸ਼ੀਸ਼ ਚਾਵਲਾ ਨੇ ਦੱਸਿਆ ਕਿ ਫੈਕਟਰੀ ਮਾਲਕ ਕੋਲ ਲਾਇਸੈਂਸ ਕਿਸੇ ਹੋਰ ਸਥਾਨ ਦਾ ਹੈ, ਜਦਕਿ ਇੱਥੇ ਹਰਿਆਣਾ ਤੋਂ ਡਰੰਮਾਂ ਵਿੱਚ ਸਮਾਨ ਮੰਗਵਾ ਕੇ ਆਪਣੀ ਪੈਕਿੰਗ ਵਿੱਚ ਪੈਕ ਕਰਨ ਤੋਂ ਬਾਅਦ ਬਾਜ਼ਾਰ ਵਿੱਚ ਸਪਲਾਈ ਕੀਤੇ ਜਾਣ ਦੀ ਗੱਲ ਸਾਹਮਣੇ ਆਈ ਹੈ। ਉਨ੍ਹਾਂ ਦੱਸਿਆ ਕਿ ਜਿਹੜਾ ਉਤਪਾਦ ਖ਼ਰਾਬ ਹੋ ਚੁੱਕਾ ਹੈ ਜਾਂ ਜਿਸ ਵਿੱਚੋਂ ਬਦਬੂ ਆ ਰਹੀ ਹੈ, ਉਸ ਨੂੰ ਨਸ਼ਟ ਕਰਨ ਦੀ ਕਾਰਵਾਈ ਕੀਤੀ ਜਾ ਰਹੀ ਹੈ। ਫੂਡ ਸੇਫਟੀ ਵਿਭਾਗ ਵੱਲੋਂ ਲਏ ਗਏ ਸੈਂਪਲਾਂ ਦੀ ਜਾਂਚ ਰਿਪੋਰਟ ਆਉਣ ਤੋਂ ਬਾਅਦ ਹੀ ਇਹ ਸਪੱਸ਼ਟ ਹੋਵੇਗਾ ਕਿ ਉਤਪਾਦ ਖਾਣ-ਪੀਣ ਦੇ ਯੋਗ ਹਨ ਜਾਂ ਨਹੀਂ।
ਅਧਿਕਾਰੀਆਂ ਨੇ ਕਿਹਾ ਕਿ ਜੇਕਰ ਜਾਂਚ ਦੌਰਾਨ ਉਤਪਾਦਾਂ ਵਿੱਚ ਕੋਈ ਗੜਬੜੀ ਜਾਂ ਨਿਯਮਾਂ ਦੀ ਉਲੰਘਣਾ ਸਾਹਮਣੇ ਆਉਂਦੀ ਹੈ ਤਾਂ ਹਰਿਆਣਾ ਤੋਂ ਸਮਾਨ ਭੇਜਣ ਵਾਲੀ ਥਾਂ ਦੇ ਸਬੰਧਤ ਅਧਿਕਾਰੀਆਂ ਨੂੰ ਵੀ ਸੂਚਿਤ ਕੀਤਾ ਜਾਵੇਗਾ। 

Newsline Express

Author: Newslineexpres@1