🚩 ਪੰਜਾਬ ਤੋਂ ਮਨਾਲੀ ਦਾ ਸਫ਼ਰ ਹੋਇਆ ਆਸਾਨ; ਡਿਓਧ-ਹਨੋਗੀ 2 ਸੁਰੰਗਾਂ ਆਵਾਜਾਈ ਲਈ ਖੁੱਲ੍ਹੀਆਂ

🚩  ਪੰਜਾਬ ਤੋਂ ਮਨਾਲੀ ਦਾ ਸਫ਼ਰ ਹੋਇਆ ਆਸਾਨ; ਡਿਓਧ-ਹਨੋਗੀ 2 ਸੁਰੰਗਾਂ ਆਵਾਜਾਈ ਲਈ ਖੁੱਲ੍ਹੀਆਂ

ਮੰਡੀ, 11 ਸਤੰਬਰ : ਨਿਊਜ਼ਲਾਈਨ ਐਕਸਪ੍ਰੈਸ –   ਮਨਾਲੀ ਜਾਣ ਵਾਲੇ ਸੈਲਾਨੀਆਂ ਨੂੰ ਵੱਡੀ ਰਾਹਤ ਮਿਲੀ ਹੈ। ਕੀਰਤਪੁਰ-ਮਨਾਲੀ ਫੋਰ-ਲੇਨ ਹਾਈਵੇਅ ’ਤੇ ਡਿਓਧ ਅਤੇ ਹਨੋਗੀ ਸੁਰੰਗਾਂ ਸ਼ੁੱਕਰਵਾਰ ਤੋਂ ਵਾਹਨਾਂ ਲਈ ਖੋਲ੍ਹ ਦਿੱਤੀਆਂ ਗਈਆਂ ਹਨ। ਇਨ੍ਹਾਂ ਦੇ ਚਾਲੂ ਹੋਣ ਨਾਲ ਜਾਮ ਅਤੇ ਲੈਂਡਸਲਾਈਡ ਪ੍ਰਭਾਵਿਤ ਇਲਾਕਿਆਂ ਤੋਂ ਲੰਘਣ ਦੀ ਸਮੱਸਿਆ ਘਟੇਗੀ।NHAI ਵੱਲੋਂ ਪੰਡੋਹ-ਟਾਕੋਲੀ ਸੈਕਸ਼ਨ ਵਿੱਚ 2.8 ਕਿਲੋਮੀਟਰ ਲੰਬੀ ਡਿਓਧ ਅਤੇ 650 ਮੀਟਰ ਲੰਬੀ ਹਨੋਗੀ ਸੁਰੰਗ ਤਿਆਰ ਕੀਤੀ ਗਈ ਹੈ। ਇਨ੍ਹਾਂ ਸੁਰੰਗਾਂ ਰਾਹੀਂ ਕਰੀਬ 5.5 ਕਿਲੋਮੀਟਰ ਦੇ ਮੁਸ਼ਕਲ ਹਿੱਸੇ ਨੂੰ ਬਾਈਪਾਸ ਕੀਤਾ ਜਾ ਸਕੇਗਾ। ਇਸ ਨਾਲ ਸਫ਼ਰ ਦੀ ਦੂਰੀ ਵੀ ਲਗਭਗ 6 ਕਿਲੋਮੀਟਰ ਤੋਂ ਘਟ ਕੇ 3.5 ਕਿਲੋਮੀਟਰ ਰਹਿ ਜਾਵੇਗੀ।
ਜੋਗਨੀ ਮਾਤਾ ਮੰਦਰ, ਡਿਓਧ ਅਤੇ ਹਨੋਗੀ ਇਲਾਕਿਆਂ ਵਿੱਚ ਲੱਗਣ ਵਾਲੇ ਲੰਬੇ ਜਾਮ ਤੋਂ ਵੀ ਰਾਹਤ ਮਿਲਣ ਦੀ ਉਮੀਦ ਹੈ। ਮੰਡੀ ਤੋਂ ਕੁੱਲੂ ਤੱਕ ਯਾਤਰਾ ਦਾ ਸਮਾਂ ਵੀ ਲਗਭਗ ਦੋ ਘੰਟਿਆਂ ਤੋਂ ਘਟ ਕੇ ਇੱਕ ਘੰਟੇ ਦੇ ਕਰੀਬ ਰਹਿਣ ਦੀ ਉਮੀਦ ਹੈ। ਇਸ ਦਾ ਸਭ ਤੋਂ ਵੱਧ ਲਾਭ ਪੰਜਾਬ, ਚੰਡੀਗੜ੍ਹ, ਹਰਿਆਣਾ ਅਤੇ ਦਿੱਲੀ ਤੋਂ ਮਨਾਲੀ ਜਾਣ ਵਾਲੇ ਸੈਲਾਨੀਆਂ ਨੂੰ ਮਿਲੇਗਾ।
ਦੋਵਾਂ ਸੁਰੰਗਾਂ ਵਿੱਚ CCTV ਨਿਗਰਾਨੀ, ਹਵਾਦਾਰੀ ਅਤੇ ਐਮਰਜੈਂਸੀ ਨਿਕਾਸ ਵਰਗੀਆਂ ਸੁਰੱਖਿਆ ਸਹੂਲਤਾਂ ਮੁਹੱਈਆ ਕਰਵਾਈਆਂ ਗਈਆਂ ਹਨ। ਇਹ ਸੁਰੰਗਾਂ 18.9 ਕਿਲੋਮੀਟਰ ਲੰਬੇ ਪੰਡੋਹ ਬਾਈਪਾਸ-ਟਾਕੋਲੀ ਫੋਰ-ਲੇਨ ਪ੍ਰੋਜੈਕਟ ਦਾ ਹਿੱਸਾ ਹਨ, ਜਿਸ ਦੀ ਲਾਗਤ ਕਰੀਬ 4,465.94 ਕਰੋੜ ਰੁਪਏ ਹੈ।

Newsline Express

Author: Newslineexpres@1