🚩ਤੀਰਅੰਦਾਜ਼ੀ ਕੋਚਾਂ ਦੀ ਸਮਰੱਥਾ ਵਧਾਉਣ ਲਈ ਉੱਤਰੀ ਜ਼ੋਨ ਦੀ ਵਰਕਸ਼ਾਪ ਮੋਹਾਲੀ ’ਚ

🚩 ਤੀਰਅੰਦਾਜ਼ੀ ਕੋਚਾਂ ਦੀ ਸਮਰੱਥਾ ਵਧਾਉਣ ਲਈ ਉੱਤਰੀ ਜ਼ੋਨ ਦੀ ਵਰਕਸ਼ਾਪ ਮੋਹਾਲੀ ’ਚ

🚩 50 ਤੋਂ ਵੱਧ ਕੋਚ ਤੇ ਸੀਨੀਅਰ ਤੀਰਅੰਦਾਜ਼ ਲੈਣਗੇ ਹਿੱਸਾ; ਆਰਚਰੀ ਐਸੋਸੀਏਸ਼ਨ ਆਫ਼ ਇੰਡੀਆ ਅਤੇ ਓਜੀਕਿਊ ਦੇ ਮਾਹਿਰ ਕਰਨਗੇ ਮਾਰਗਦਰਸ਼ਨ

ਪਟਿਆਲਾ / ਨਿਊਜ਼ਲਾਈਨ ਐਕਸਪ੍ਰੈਸ – ਤੀਰਅੰਦਾਜ਼ੀ ਦੀ ਸਿਖਲਾਈ ਦੇ ਮਿਆਰ ਨੂੰ ਹੋਰ ਬਿਹਤਰ ਬਣਾਉਣ, ਕੋਚਾਂ ਦੇ ਗਿਆਨ ਵਿੱਚ ਵਾਧਾ ਕਰਨ ਅਤੇ ਖੇਡ ਦੇ ਨਵੀਨਤਮ ਨਿਯਮਾਂ ਬਾਰੇ ਜਾਣਕਾਰੀ ਦੇਣ ਦੇ ਉਦੇਸ਼ ਨਾਲ ਪੰਜਾਬ ਆਰਚਰੀ ਐਸੋਸੀਏਸ਼ਨ ਵੱਲੋਂ ਉੱਤਰੀ ਜ਼ੋਨ ਦੇ ਕੋਚਾਂ ਲਈ ਲੈਵਲ-1 ਵਰਕਸ਼ਾਪ ਕਰਵਾਈ ਜਾਵੇਗੀ। ਆਰਚਰੀ ਐਸੋਸੀਏਸ਼ਨ ਆਫ਼ ਇੰਡੀਆ ਅਤੇ ਓਜੀਕਿਊ (OGQ) ਦੇ ਸਹਿਯੋਗ ਨਾਲ ਲਗਾਤਾਰ ਸਿੱਖਿਆ ਪ੍ਰੋਗਰਾਮ ਤਹਿਤ ਇਹ ਵਰਕਸ਼ਾਪ 18 ਤੋਂ 21 ਸਤੰਬਰ 2026 ਤੱਕ ਮੋਹਾਲੀ ਸਥਿਤ ਦਿ ਐਲੀਵੇਟ ਹੋਟਲ ਵਿਖੇ ਕਰਵਾਉਣ ਦੀ ਯੋਜਨਾ ਹੈ।

ਇਸ ਵਰਕਸ਼ਾਪ ਦਾ ਮੁੱਖ ਉਦੇਸ਼ ਤੀਰਅੰਦਾਜ਼ੀ ਕੋਚਾਂ ਨੂੰ ਆਰਚਰੀ ਐਸੋਸੀਏਸ਼ਨ ਆਫ਼ ਇੰਡੀਆ (ਏਏਆਈ) ਅਤੇ ਵਿਸ਼ਵ ਤੀਰਅੰਦਾਜ਼ੀ ਸੰਸਥਾ (ਡਬਲਿਊਏ) ਦੇ ਨਵੀਨਤਮ ਨਿਯਮਾਂ ਤੋਂ ਜਾਣੂ ਕਰਵਾਉਣਾ ਅਤੇ ਉਨ੍ਹਾਂ ਦੇ ਪੇਸ਼ੇਵਰ ਗਿਆਨ ਨੂੰ ਅਪਡੇਟ ਕਰਨਾ ਹੈ। ਇਸ ਦੇ ਨਾਲ ਹੀ ਤੀਰਅੰਦਾਜ਼ੀ ਖੇਡ ਦਾ ਪਸਾਰ ਕਰਨ, ਇਸ ਪ੍ਰਤੀ ਜਾਗਰੂਕਤਾ ਵਧਾਉਣ ਅਤੇ ਸਿਖਲਾਈ ਦੀਆਂ ਬਿਹਤਰ ਵਿਧੀਆਂ ਨੂੰ ਉਤਸ਼ਾਹਿਤ ਕਰਨ ’ਤੇ ਵੀ ਧਿਆਨ ਦਿੱਤਾ ਜਾਵੇਗਾ।

ਵਰਕਸ਼ਾਪ ਵਿੱਚ ਆਰਚਰੀ ਐਸੋਸੀਏਸ਼ਨ ਆਫ਼ ਇੰਡੀਆ ਦੇ ਮਾਹਿਰ ਪੀ. ਐੱਚ. ਗੰਗਾਧਰ, ਜੋ ਸਪੋਰਟਸ ਅਥਾਰਟੀ ਆਫ਼ ਇੰਡੀਆ (ਸਾਈ) ਦੇ ਕੋਲਕਾਤਾ ਕੇਂਦਰ ਵਿੱਚ ਮੁੱਖ ਕੋਚ ਅਤੇ ਵਿਭਾਗ ਮੁਖੀ ਹਨ, ਅਤੇ ਅਮਰਜੀਤ ਦੂਬੇ ਸ਼ਾਮਲ ਹੋਣਗੇ। ਇਸ ਤੋਂ ਇਲਾਵਾ ਓਜੀਕਿਊ ਦੇ ਸੀਨੀਅਰ ਖੇਡ ਪੋਸ਼ਣ ਮਾਹਿਰ ਯੋਗੇਸ਼ ਕੁਮਾਰ ਅਤੇ ਖੇਡ ਫਿਜ਼ੀਓਥੈਰੇਪਿਸਟ ਡਾ. ਸਨੇਹਿਲ ਖੁਰਾਣਾ (ਪੀ.ਟੀ.) ਵੀ ਆਪਣੀ ਮੁਹਾਰਤ ਸਾਂਝੀ ਕਰਨਗੇ।
ਇਸ ਸਬੰਧੀ ਜਾਣਕਾਰੀ ਦਿੰਦਿਆਂ ਐਸੋਸੀਏਸ਼ਨ ਦੇ ਸਕਤੱਰ ਨਵਜੋਤ ਸਿੱਧੂ ਨੇ ਦੱਸਿਆ ਕਿ ਉੱਤਰੀ ਭਾਰਤ ਦੇ ਵੱਖ-ਵੱਖ ਸੂਬਿਆਂ ਤੋਂ ਚੁਣੇ ਗਏ 50 ਤੋਂ ਵੱਧ ਕੋਚ ਅਤੇ ਸੀਨੀਅਰ ਤੀਰਅੰਦਾਜ਼ ਇਸ ਵਰਕਸ਼ਾਪ ਵਿੱਚ ਹਿੱਸਾ ਲੈਣਗੇ। ਇਸ ਨਾਲ ਭਾਗੀਦਾਰਾਂ ਨੂੰ ਖੇਡ ਦੇ ਨਿਯਮਾਂ ਅਤੇ ਤਕਨੀਕੀ ਪਹਿਲੂਆਂ ਬਾਰੇ ਜਾਣਕਾਰੀ ਹਾਸਲ ਕਰਨ ਦੇ ਨਾਲ-ਨਾਲ ਮਾਹਿਰਾਂ ਦੇ ਤਜਰਬੇ ਤੋਂ ਸਿੱਖਣ ਦਾ ਮੌਕਾ ਮਿਲੇਗਾ।
ਪੰਜਾਬ ਆਰਚਰੀ ਐਸੋਸੀਏਸ਼ਨ ਵੱਲੋਂ ਕਰਵਾਈ ਜਾ ਰਹੀ ਇਹ ਵਰਕਸ਼ਾਪ ਤੀਰਅੰਦਾਜ਼ੀ ਨਾਲ ਜੁੜੇ ਕੋਚਾਂ ਦੇ ਗਿਆਨ ਨੂੰ ਨਵੀਂ ਜਾਣਕਾਰੀ ਨਾਲ ਜੋੜਨ ਅਤੇ ਖੇਡ ਵਿੱਚ ਸਿਖਲਾਈ ਦੇ ਮਿਆਰ ਨੂੰ ਹੋਰ ਬਿਹਤਰ ਬਣਾਉਣ ਦੇ ਉਦੇਸ਼ ਨਾਲ ਉਲੀਕੀ ਗਈ ਹੈ।   Newsline Express

Author: Newslineexpres@1