🚩 ਹਜ਼ਾਰਾਂ WhatsApp ਅਕਾਊਂਟ ਅਚਾਨਕ ਹੋਏ ਬੰਦ, ਯੂਜ਼ਰਾਂ ਵਿੱਚ ਮਚਿਆ ਹੜਕੰਪ

🚩 ਹਜ਼ਾਰਾਂ WhatsApp ਅਕਾਊਂਟ ਅਚਾਨਕ ਹੋਏ ਬੰਦ, ਯੂਜ਼ਰਾਂ ਵਿੱਚ ਮਚਿਆ ਹੜਕੰਪ

🚩 ਬਿਨਾਂ ਚਿਤਾਵਨੀ ‘Under Review’ ਹੋਏ ਖਾਤੇ, ਕੰਪਨੀ ਨੇ 24 ਘੰਟੇ ਉਡੀਕਣ ਲਈ ਕਿਹਾ

ਨਵੀਂ ਦਿੱਲੀ, 4 ਅਗਸਤ : ਨਿਊਜ਼ਲਾਈਨ ਐਕਸਪ੍ਰੈਸ –         ਦੇਸ਼ ਭਰ ਵਿੱਚ ਹਜ਼ਾਰਾਂ WhatsApp ਯੂਜ਼ਰਾਂ ਦੇ ਅਕਾਊਂਟ ਅਚਾਨਕ ਬੰਦ ਹੋਣ ਨਾਲ ਹੜਕੰਪ ਮਚ ਗਿਆ। ਪ੍ਰਭਾਵਿਤ ਯੂਜ਼ਰਾਂ ਦੀ ਸਕ੍ਰੀਨ ’ਤੇ ‘Your account is under review’ ਦਾ ਸੁਨੇਹਾ ਦਿਖਾਈ ਦਿੱਤਾ। ਕਈ ਯੂਜ਼ਰਾਂ ਦਾ ਦਾਅਵਾ ਹੈ ਕਿ ਉਨ੍ਹਾਂ ਨੂੰ ਅਕਾਊਂਟ ਬੰਦ ਕਰਨ ਤੋਂ ਪਹਿਲਾਂ ਨਾ ਕੋਈ ਚਿਤਾਵਨੀ ਦਿੱਤੀ ਗਈ ਅਤੇ ਨਾ ਹੀ ਕਾਰਨ ਦੱਸਿਆ ਗਿਆ। WhatsApp ਵੱਲੋਂ ਦਿਖਾਏ ਗਏ ਨੋਟੀਫਿਕੇਸ਼ਨ ਅਨੁਸਾਰ ਯੂਜ਼ਰਾਂ ਦੇ ਅਕਾਊਂਟ ਦੀ ਗਤੀਵਿਧੀ ਅਤੇ ਡਿਵਾਈਸ ਨਾਲ ਜੁੜੀ ਜਾਣਕਾਰੀ ਦੀ ਜਾਂਚ ਕੀਤੀ ਜਾ ਰਹੀ ਹੈ। ਕੰਪਨੀ ਇਹ ਪਤਾ ਲਗਾ ਰਹੀ ਹੈ ਕਿ ਅਕਾਊਂਟ ਵੱਲੋਂ WhatsApp ਦੀਆਂ ਸੇਵਾ ਸ਼ਰਤਾਂ ਦੀ ਪਾਲਣਾ ਕੀਤੀ ਗਈ ਹੈ ਜਾਂ ਨਹੀਂ।

ਕੰਪਨੀ ਮੁਤਾਬਕ ਅਕਾਊਂਟ ਦੀ ਸਮੀਖਿਆ ਦੀ ਪ੍ਰਕਿਰਿਆ ਆਮ ਤੌਰ ’ਤੇ 24 ਘੰਟਿਆਂ ਵਿੱਚ ਪੂਰੀ ਹੋ ਜਾਂਦੀ ਹੈ। ਹਾਲਾਂਕਿ ਕਈ ਯੂਜ਼ਰਾਂ ਨੇ ਦੱਸਿਆ ਕਿ ਉਨ੍ਹਾਂ ਦੇ ਅਕਾਊਂਟ 24 ਘੰਟਿਆਂ ਤੋਂ ਪਹਿਲਾਂ ਹੀ ਮੁੜ ਚਾਲੂ ਹੋ ਗਏ। ਅਚਾਨਕ ਅਕਾਊਂਟ ਬੰਦ ਹੋਣ ਮਗਰੋਂ ਸੋਸ਼ਲ ਮੀਡੀਆ ਪਲੇਟਫਾਰਮ X ’ਤੇ ਸ਼ਿਕਾਇਤਾਂ ਦੀ ਬਾੜ ਆ ਗਈ। ਬਹੁਤ ਸਾਰੇ ਯੂਜ਼ਰਾਂ ਨੇ ਕਿਹਾ ਕਿ ਉਨ੍ਹਾਂ ਨੇ  WhatsApp ਦੇ ਕਿਸੇ ਨਿਯਮ ਦੀ ਉਲੰਘਣਾ ਨਹੀਂ ਕੀਤੀ, ਫਿਰ ਵੀ ਉਨ੍ਹਾਂ ਦੇ ਅਕਾਊਂਟ ਰਿਵਿਊ ਅਧੀਨ ਰੱਖ ਦਿੱਤੇ ਗਏ।

ਫਿਲਹਾਲ WhatsApp ਦੀ ਮਾਲਕ ਕੰਪਨੀ Meta ਨੇ ਇਹ ਸਪੱਸ਼ਟ ਨਹੀਂ ਕੀਤਾ ਕਿ ਇੰਨੀ ਵੱਡੀ ਗਿਣਤੀ ਵਿੱਚ ਅਕਾਊਂਟ ਇਕੱਠੇ ਰਿਵਿਊ ਲਈ ਕਿਉਂ ਭੇਜੇ ਗਏ। ਕੰਪਨੀ ਦਾ ਕਹਿਣਾ ਹੈ ਕਿ ਇਹ ਕਾਰਵਾਈ ਪਲੇਟਫਾਰਮ ਦੀ ਸੁਰੱਖਿਆ ਅਤੇ ਨਿਯਮਾਂ ਦੀ ਪਾਲਣਾ ਯਕੀਨੀ ਬਣਾਉਣ ਲਈ ਕੀਤੀ ਜਾਂਦੀ ਹੈ। ਪ੍ਰਭਾਵਿਤ ਯੂਜ਼ਰਾਂ ਨੂੰ ਸਲਾਹ ਦਿੱਤੀ ਗਈ ਹੈ ਕਿ ਉਹ ਵਾਰ-ਵਾਰ ਅਪੀਲ ਕਰਨ ਦੀ ਬਜਾਏ ਸਮੀਖਿਆ ਪੂਰੀ ਹੋਣ ਦੀ ਉਡੀਕ ਕਰਨ ਅਤੇ ਕਿਸੇ ਵੀ ਗੈਰ-ਅਧਿਕਾਰਤ ਐਪ ਜਾਂ ਸੇਵਾ ਦੀ ਵਰਤੋਂ ਨਾ ਕਰਨ।

Newsline Express

Author: Newslineexpres@1