????ਪਟਿਆਲਾ ਬਾਰ ਐਸੋਸੀਏਸ਼ਨ ਵੱਲੋਂ 5 ਮਈ ਨੂੰ ‘’ਨੋ-ਵਰਕ-ਡੇ’’ ਦਾ ਐਲਾਨ
????ਸੂਬਾ ਪੱਧਰੀ ਸੱਦੇ ਦੇ ਹੱਕ ਵਿੱਚ ਵਕੀਲਾਂ ਵੱਲੋਂ ਮੰਗਲਵਾਰ ਨੂੰ ਕੰਮਕਾਜ ਬੰਦ
ਪਟਿਆਲਾ, 4 ਮਈ / ਗੁਰਪ੍ਰੀਤ ਸਿੰਘ ਖੇੜੀਮਾਨੀਆ -ਨਿਊਜ਼ਲਾਈਨ ਐਕਸਪ੍ਰੈਸ –
ਡਿਸਟ੍ਰਿਕਟ ਬਾਰ ਐਸੋਸੀਏਸ਼ਨ (ਡੀਬੀਏ) ਪਟਿਆਲਾ ਦੀ ਐਗਜ਼ਿਕਟਿਵ ਬਾਡੀ ਦੀ ਐਮਰਜੈਂਸੀ ਮੀਟਿੰਗ ਪ੍ਰਧਾਨ ਐਡਵੋਕੇਟ ਮਨਵੀਰ ਤਿਵਾਣਾ ਦੀ ਅਗਵਾਈ ਹੇਠ ਹੋਈ, ਜਿਸ ਵਿੱਚ ਸਰਬਸੰਮਤੀ ਨਾਲ 5 ਮਈ 2026 (ਮੰਗਲਵਾਰ) ਨੂੰ “ਨੋ ਵਰਕ ਡੇ” ਮਨਾਉਣ ਦਾ ਫੈਸਲਾ ਕੀਤਾ ਗਿਆ।
ਇਹ ਫੈਸਲਾ ਬਾਰ ਐਸੋਸੀਏਸ਼ਨ ਜਲਾਲਾਬਾਦ ਵੱਲੋਂ ਦਿੱਤੇ ਗਏ ਸੂਬਾ ਪੱਧਰੀ ਸੱਦੇ ਦੇ ਮੱਦੇਨਜ਼ਰ ਲਿਆ ਗਿਆ ਹੈ। ਇਹ ਸੱਦਾ ਫਾਜ਼ਿਲਕਾ ਦੇ ਪੁਲਿਸ ਸਟੇਸ਼ਨ ਸਿਟੀ ਵਿੱਚ ਐਡਵੋਕੇਟ ਰਾਕੇਸ਼ ਕੁਮਾਰ ਪੰਧੂ ਨਾਲ ਸੰਬੰਧਿਤ ਇੱਕ ਕਥਿਤ ਘਟਨਾ ‘ਤੇ ਚਿੰਤਾ ਜਤਾਉਂਦੇ ਹੋਏ ਦਿੱਤਾ ਗਿਆ ਹੈ। ਕਾਨੂੰਨੀ ਭਾਈਚਾਰੇ ਵੱਲੋਂ ਇਸ ਮਾਮਲੇ ਵਿੱਚ ਸਮੇਂ-ਸਿਰ ਕਾਰਵਾਈ ਨਾ ਹੋਣ ਸਬੰਧੀ ਵੀ ਐਤਰਾਜ਼ ਜਤਾਇਆ ਗਿਆ ਹੈ।
ਡੀਬੀਏ ਪਟਿਆਲਾ ਨੇ ਕਿਹਾ ਕਿ ਉਹ ਹਮੇਸ਼ਾਂ ਕਾਨੂੰਨੀ ਭਾਈਚਾਰੇ ਦੇ ਨਾਲ ਖੜ੍ਹੀ ਰਹੀ ਹੈ ਅਤੇ ਵਕੀਲਾਂ ਦੀ ਇੱਜ਼ਤ ਤੇ ਸੁਰੱਖਿਆ ਨਾਲ ਜੁੜੇ ਮਾਮਲਿਆਂ ‘ਤੇ ਗੰਭੀਰ ਚਿੰਤਾ ਪ੍ਰਗਟ ਕਰਦੀ ਹੈ।
ਇਸ ਸੂਬਾ ਪੱਧਰੀ ਸੱਦੇ ਨੂੰ ਧਿਆਨ ਵਿੱਚ ਰੱਖਦੇ ਹੋਏ, ਐਸੋਸੀਏਸ਼ਨ ਵੱਲੋਂ ਸਾਰੇ ਮਾਣਯੋਗ ਨਿਆਇਕ ਅਧਿਕਾਰੀਆਂ, ਰੇਵਨਿਊ ਅਦਾਲਤਾਂ, ਐਮਐਸਐਮਈ ਕੋਰਟ, ਜ਼ਿਲ੍ਹਾ ਖਪਤਕਾਰ ਫੋਰਮ ਪਟਿਆਲਾ, ਲੇਬਰ ਕੋਰਟ ਅਤੇ ਪਰਮਾਨੈਂਟ ਲੋਕ ਅਦਾਲਤ (PLA) ਪਟਿਆਲਾ ਸਮੇਤ ਸੰਬੰਧਤ ਅਧਿਕਾਰੀਆਂ ਨੂੰ ਬੇਨਤੀ ਕੀਤੀ ਗਈ ਹੈ ਕਿ ਡੀਬੀਏ ਪਟਿਆਲਾ ਦੇ ਮੈਂਬਰਾਂ ਨਾਲ ਸੰਬੰਧਿਤ ਕੇਸਾਂ ਨੂੰ ਕਿਸੇ ਹੋਰ ਉਚਿਤ ਤਾਰੀਖ ਲਈ ਮੁਲਤਵੀ ਕੀਤਾ ਜਾਵੇ। ਇਸਦੇ ਨਾਲ ਹੀ 5 ਮਈ ਨੂੰ ਕੋਈ ਵੀ ਨਕਾਰਾਤਮਕ ਹੁਕਮ ਜਾਰੀ ਨਾ ਕਰਨ ਦੀ ਵੀ ਅਪੀਲ ਕੀਤੀ ਗਈ ਹੈ।
ਐਗਜ਼ਿਕਟਿਵ ਬਾਡੀ ਨੇ ਦੁਹਰਾਇਆ ਕਿ ਉਹ ਕਾਨੂੰਨੀ ਭਾਈਚਾਰੇ ਦੇ ਹੱਕਾਂ ਅਤੇ ਸੁਰੱਖਿਆ ਲਈ ਵਚਨਬੱਧ ਹੈ।
Newsline Express
