🚩39 ਤੋਲੇ ਸੋਨੇ ਦੇ ਗਹਿਣਿਆਂ ਦੀ ਚੋਰੀ ਦਾ ਪਰਦਾਫਾਸ਼; 4 ਮੁਲਜ਼ਮ ਕਾਬੂ, ਮੁੱਖ ਸਰਗਨਾ ਸੁੱਖਾ ਤੇ ਫੌਜੀ ਦੀ ਭਾਲ ਜਾਰੀ

🚩39 ਤੋਲੇ ਸੋਨੇ ਦੇ ਗਹਿਣਿਆਂ ਦੀ ਚੋਰੀ ਦਾ ਪਰਦਾਫਾਸ਼; 4 ਮੁਲਜ਼ਮ ਕਾਬੂ, ਮੁੱਖ ਸਰਗਨਾ ਸੁੱਖਾ ਤੇ ਫੌਜੀ ਦੀ ਭਾਲ ਜਾਰੀ

ਫਤਿਹਗੜ੍ਹ ਸਾਹਿਬ/ਨਿਊਜ਼ਲਾਈਨ ਐਕਸਪ੍ਰੈਸ –   ਫਤਿਹਗੜ੍ਹ ਸਾਹਿਬ ਪੁਲਿਸ ਨੇ ਪਿਛਲੇ ਮਹੀਨੇ ਪਿੰਡ ਰਾਜਿੰਦਰ ਨਗਰ ਅਤੇ ਬਡ ਰੁੜਕੀ ਵਿੱਚ ਚਾਰ ਘਰਾਂ ਵਿੱਚ ਹੋਈਆਂ ਲੱਖਾਂ ਰੁਪਏ ਦੀਆਂ ਚੋਰੀਆਂ ਦੀ ਗੁੱਥੀ ਸੁਲਝਾਉਂਦਿਆਂ ਚਾਰ ਮੁਲਜ਼ਮਾਂ ਨੂੰ ਗ੍ਰਿਫ਼ਤਾਰ ਕਰ ਲਿਆ ਹੈ। ਪੁਲਿਸ ਨੇ ਦੱਸਿਆ ਕਿ ਗਿਰੋਹ ਦੇ ਮੁੱਖ ਸਰਗਨਾ ਸੁੱਖਾ ਅਤੇ ਫੌਜੀ ਹਾਲੇ ਫਰਾਰ ਹਨ, ਜਿਨ੍ਹਾਂ ਦੀ ਗ੍ਰਿਫ਼ਤਾਰੀ ਲਈ ਛਾਪੇਮਾਰੀ ਜਾਰੀ ਹੈ। ਚੋਰੀ ਕੀਤਾ ਸੋਨਾ ਖਰੀਦਣ ਵਾਲੇ ਸੁਨਿਆਰਿਆਂ ਦੀ ਵੀ ਪਛਾਣ ਕਰ ਲਈ ਗਈ ਹੈ ਅਤੇ ਗਹਿਣਿਆਂ ਦੀ ਬਰਾਮਦਗੀ ਲਈ ਕਾਰਵਾਈ ਕੀਤੀ ਜਾ ਰਹੀ ਹੈ।

ਡੀਐਸਪੀ ਕੁਲਬੀਰ ਸਿੰਘ ਨੇ ਪ੍ਰੈਸ ਕਾਨਫਰੰਸ ਦੌਰਾਨ ਦੱਸਿਆ ਕਿ ਐੱਸਐੱਸਪੀ ਸ਼ੁਭਮ ਅਗਰਵਾਲ ਦੇ ਦਿਸ਼ਾ-ਨਿਰਦੇਸ਼ਾਂ ਹੇਠ ਡੀਐਸਪੀ, ਸੀਆਈਏ ਸਟਾਫ਼ ਅਤੇ ਥਾਣਾ ਮੁੱਲਾਪੁਰ ਦੀ ਸਾਂਝੀ ਟੀਮ ਨੇ ਸੀਸੀਟੀਵੀ ਫੁਟੇਜ ਅਤੇ ਤਕਨੀਕੀ ਸਬੂਤਾਂ ਦੇ ਆਧਾਰ ‘ਤੇ ਮਾਮਲੇ ਦੀ ਜਾਂਚ ਕੀਤੀ।

ਜਾਂਚ ਦੌਰਾਨ ਦੋਰਾਹਾ ਦੇ ਸਤਨਾਮ ਨਗਰ ਵਾਸੀ ਭਰਾ ਵਿਸ਼ਾਲ ਅਤੇ ਸਾਬਰ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ। ਉਨ੍ਹਾਂ ਦੀ ਪੁੱਛਗਿੱਛ ਤੋਂ ਬਾਅਦ ਪਟਿਆਲਾ ਦੇ ਰਾਹੁਲ ਅਤੇ ਹਿਮਾਚਲ ਪ੍ਰਦੇਸ਼ ਦੇ ਕਾਂਗੜਾ ਜ਼ਿਲ੍ਹੇ ਦੇ ਪਿੰਡ ਲੋਹਾਰ ਅਟਵਾਲ ਦੇ ਸੰਜੂ ਨੂੰ ਵੀ ਕਾਬੂ ਕਰ ਲਿਆ ਗਿਆ। ਪੁਲਿਸ ਅਨੁਸਾਰ ਸੰਜੂ ਵਿਰੁੱਧ ਹਿਮਾਚਲ ਪ੍ਰਦੇਸ਼ ਵਿੱਚ ਕਰੀਬ 20 ਅਤੇ ਫਤਿਹਗੜ੍ਹ ਸਾਹਿਬ ਵਿੱਚ 2 ਅਪਰਾਧਿਕ ਮਾਮਲੇ ਪਹਿਲਾਂ ਹੀ ਦਰਜ ਹਨ।

ਪੁਲਿਸ ਜਾਂਚ ਵਿੱਚ ਸਾਹਮਣੇ ਆਇਆ ਕਿ ਗਿਰੋਹ ਦਾ ਸੰਚਾਲਨ ਸੁੱਖਾ ਅਤੇ ਫੌਜੀ ਕਰਦੇ ਸਨ। ਉਹੀ ਇਹ ਤੈਅ ਕਰਦੇ ਸਨ ਕਿ ਕਿਸ ਘਰ ਦੀ ਰੇਕੀ ਕੌਣ ਕਰੇਗਾ, ਵਾਹਨ ਕੌਣ ਚਲਾਏਗਾ ਅਤੇ ਤਾਲੇ ਕੌਣ ਤੋੜੇਗਾ। ਚੋਰੀ ਤੋਂ ਬਾਅਦ ਲੁੱਟਿਆ ਹੋਇਆ ਸੋਨਾ ਵੇਚ ਕੇ ਰਕਮ ਆਪਸ ਵਿੱਚ ਵੰਡ ਲਈ ਜਾਂਦੀ ਸੀ।

ਜ਼ਿਕਰਯੋਗ ਹੈ ਕਿ 9-10 ਜੂਨ ਦੀ ਰਾਤ ਪਿੰਡ ਰਾਜਿੰਦਰ ਨਗਰ ਵਿੱਚ ਬਲਵਿੰਦਰ ਸਿੰਘ ਦੇ ਘਰੋਂ ਕਰੀਬ 39 ਤੋਲੇ ਸੋਨੇ ਦੇ ਗਹਿਣੇ ਅਤੇ ਨਕਦੀ ਚੋਰੀ ਹੋਈ ਸੀ। ਇਸੇ ਰਾਤ ਬਲਜਿੰਦਰ ਸਿੰਘ ਦੇ ਘਰੋਂ ਵੀ 2.5 ਤੋਲੇ ਸੋਨੇ ਦੇ ਗਹਿਣੇ ਅਤੇ ਨਕਦੀ ਚੋਰੀ ਕਰ ਲਈ ਗਈ ਸੀ। ਇਸ ਤੋਂ ਇਲਾਵਾ 16-17 ਜੂਨ ਦੀ ਰਾਤ ਪਿੰਡ ਬਡ ਰੁੜਕੀ ਵਿੱਚ ਗੁਰਵੀਰ ਸਿੰਘ ਦੇ ਘਰੋਂ 1.5 ਤੋਲੇ ਸੋਨਾ ਅਤੇ 50 ਹਜ਼ਾਰ ਰੁਪਏ, ਜਦਕਿ ਅਮਨਦੀਪ ਸਿੰਘ ਦੇ ਘਰੋਂ ਸੋਨੇ-ਚਾਂਦੀ ਦੇ ਗਹਿਣੇ ਅਤੇ 70 ਹਜ਼ਾਰ ਰੁਪਏ ਦੀ ਨਕਦੀ ਚੋਰੀ ਹੋਈ ਸੀ।

ਡੀਐਸਪੀ ਨੇ ਦੱਸਿਆ ਕਿ ਚੋਰੀ ਕੀਤਾ ਗਿਆ ਸੋਨਾ ਵੇਚਣ ਵਾਲੇ ਸੁਨਿਆਰਿਆਂ ਦੀ ਪਛਾਣ ਹੋ ਚੁੱਕੀ ਹੈ ਅਤੇ ਜਲਦ ਹੀ ਗਹਿਣੇ ਬਰਾਮਦ ਕਰ ਲਏ ਜਾਣਗੇ। ਫਰਾਰ ਮੁੱਖ ਸਰਗਨਾ ਸੁੱਖਾ ਅਤੇ ਫੌਜੀ ਨੂੰ ਵੀ ਜਲਦੀ ਕਾਬੂ ਕਰਨ ਦਾ ਦਾਅਵਾ ਕੀਤਾ ਗਿਆ ਹੈ। Newsline Express