🚩 ਵਿਆਹ ਦੇ ਬੰਧਨ ‘ਚ ਬੱਝੇ ਕ੍ਰਿਕਟਰ ਰਮਨਦੀਪ ਸਿੰਘ ਅਤੇ ਅਦਾਕਾਰਾ ਚਾਰਲੀ ਚੌਹਾਨ

🚩 ਵਿਆਹ ਦੇ ਬੰਧਨ ‘ਚ ਬੱਝੇ ਕ੍ਰਿਕਟਰ ਰਮਨਦੀਪ ਸਿੰਘ ਅਤੇ ਅਦਾਕਾਰਾ ਚਾਰਲੀ ਚੌਹਾਨ

ਚੰਡੀਗੜ੍ਹ, 8 ਅਗਸਤ – ਨਿਊਜ਼ਲਾਈਨ ਐਕਸਪ੍ਰੈਸ  –        ਪੰਜਾਬ ਦੇ ਕ੍ਰਿਕਟਰ ਅਤੇ ਆਈਪੀਐਲ ਵਿੱਚ ਕੋਲਕਾਤਾ ਨਾਈਟ ਰਾਈਡਰਜ਼ (KKR) ਵੱਲੋਂ ਖੇਡਣ ਵਾਲੇ ਰਮਨਦੀਪ ਸਿੰਘ ਵਿਆਹ ਦੇ ਬੰਧਨ ਵਿੱਚ ਬੱਝ ਗਏ ਹਨ। ਰਮਨਦੀਪ ਨੇ ਮਸ਼ਹੂਰ ਟੀਵੀ ਅਦਾਕਾਰਾ ਚਾਰਲੀ ਚੌਹਾਨ ਨਾਲ ਰਵਾਇਤੀ ਪੰਜਾਬੀ ਰੀਤੀ-ਰਿਵਾਜਾਂ ਅਨੁਸਾਰ ਵਿਆਹ ਕਰਵਾਇਆ। ਨਿੱਜੀ ਸਮਾਗਮ ਵਿੱਚ ਦੋਵਾਂ ਪਰਿਵਾਰਾਂ ਤੋਂ ਇਲਾਵਾ ਕ੍ਰਿਕਟ ਅਤੇ ਮਨੋਰੰਜਨ ਜਗਤ ਦੀਆਂ ਕਈ ਨਾਮਵਰ ਹਸਤੀਆਂ ਨੇ ਸ਼ਿਰਕਤ ਕੀਤੀ।

ਵਿਆਹ ਸਮਾਗਮ ਵਿੱਚ ਭਾਰਤੀ ਤੇਜ਼ ਗੇਂਦਬਾਜ਼ ਅਰਸ਼ਦੀਪ ਸਿੰਘ, ਮੁੰਬਈ ਇੰਡੀਅਨਜ਼ ਦੇ ਨਮਨ ਧੀਰ ਅਤੇ ਅਸ਼ਵਨੀ ਕੁਮਾਰ, ਪੰਜਾਬ ਦੇ ਕ੍ਰਿਕਟਰ ਜਸਿੰਦਰ ਸਿੰਘ ਅਤੇ ਟੀਵੀ ਅਦਾਕਾਰ ਜੈ ਭਾਨੁਸ਼ਾਲੀ ਸਮੇਤ ਕਈ ਮਹਿਮਾਨ ਮੌਜੂਦ ਰਹੇ। ਜੈ ਭਾਨੁਸ਼ਾਲੀ ਨੇ ਵਿਆਹ ਸਮਾਗਮ ਦੀ ਤਸਵੀਰ ਆਪਣੀ ਇੰਸਟਾਗ੍ਰਾਮ ਸਟੋਰੀ ‘ਤੇ ਵੀ ਸਾਂਝੀ ਕੀਤੀ। ਸਮਾਗਮ ਦੌਰਾਨ ਰਮਨਦੀਪ ਸਿੰਘ ਕਢਾਈ ਵਾਲੀ ਕਰੀਮ ਰੰਗ ਦੀ ਸ਼ੇਰਵਾਨੀ ਵਿੱਚ ਨਜ਼ਰ ਆਏ, ਜਦਕਿ ਚਾਰਲੀ ਚੌਹਾਨ ਨੇ ਮੈਰੂਨ ਰੰਗ ਦਾ ਰਵਾਇਤੀ ਬ੍ਰਾਈਡਲ ਲਹਿੰਗਾ ਪਹਿਨਿਆ ਹੋਇਆ ਸੀ। ਦੋਵਾਂ ਦੀ ਜੋੜੀ ਨੇ ਸਮਾਗਮ ਵਿੱਚ ਖਾਸ ਖਿੱਚ ਦਾ ਕੇਂਦਰ ਬਣੀ।

ਚਾਰਲੀ ਚੌਹਾਨ ‘ਕੈਸੀ ਯੇ ਯਾਰੀਆਂ’ ਅਤੇ ‘ਬੈਸਟ ਫ੍ਰੈਂਡਜ਼ ਫਾਰਐਵਰ’ ਵਰਗੇ ਟੀਵੀ ਸ਼ੋਅਜ਼ ਨਾਲ ਲੋਕਪ੍ਰਿਯ ਹੋਈ ਹੈ। ਉਹ ਐਮਟੀਵੀ ਰੋਡੀਜ਼ ਅਤੇ ਡਾਂਸ ਰਿਐਲਿਟੀ ਸ਼ੋਅ ‘ਨੱਚ ਬਲੀਏ’ ਵਿੱਚ ਵੀ ਨਜ਼ਰ ਆ ਚੁੱਕੀ ਹੈ। ਦੂਜੇ ਪਾਸੇ ਰਮਨਦੀਪ ਸਿੰਘ ਪੰਜਾਬ ਦੀ ਘਰੇਲੂ ਕ੍ਰਿਕਟ ਟੀਮ ਨਾਲ ਜੁੜੇ ਰਹੇ ਹਨ ਅਤੇ ਆਈਪੀਐਲ ਵਿੱਚ ਕੇਕੇਆਰ ਦੀ ਨੁਮਾਇੰਦਗੀ ਕਰ ਚੁੱਕੇ ਹਨ। ਉਹ 2024 ਵਿੱਚ ਆਈਪੀਐਲ ਖਿਤਾਬ ਜਿੱਤਣ ਵਾਲੀ ਕੇਕੇਆਰ ਟੀਮ ਦਾ ਵੀ ਹਿੱਸਾ ਸਨ।

Newsline Express

Author: Newslineexpres@1