🚩 ਕਿਸ਼ਤਾਂ ਬਕਾਇਆ ਹੋਣ ‘ਤੇ ਸਰਹਿੰਦ ਰੋਡ ‘ਤੇ ਘੇਰੀ ਕਾਰ, ਚਾਬੀ ਖੋਹਣ ਤੇ ਗੱਡੀ ਕਬਜ਼ਆਉਣ ਦੀ ਕੋਸ਼ਿਸ਼

🚩 ਕਿਸ਼ਤਾਂ ਬਕਾਇਆ ਹੋਣ ‘ਤੇ ਸਰਹਿੰਦ ਰੋਡ ‘ਤੇ ਘੇਰੀ ਕਾਰ, ਚਾਬੀ ਖੋਹਣ ਤੇ ਗੱਡੀ ਕਬਜ਼ਆਉਣ ਦੀ ਕੋਸ਼ਿਸ਼
🚩 ਪੁਲਿਸ ਹੈਲਪਲਾਈਨ ‘ਤੇ ਫੋਨ ਕਰਨ ਤੋਂ ਬਾਅਦ ਦੋਵੇਂ ਧਿਰਾਂ ਥਾਣੇ ਪਹੁੰਚੀਆਂ; ਗੱਡੀ ਚਾਲਕ ਦਾ ਦੋਸ਼, ਰਿਕਵਰੀ ਲਈ ਆਏ ਵਿਅਕਤੀਆਂ ਨੇ ਨਹੀਂ ਦਿਖਾਏ ਪਛਾਣ ਪੱਤਰ ਤੇ ਅਧਿਕਾਰਤ ਦਸਤਾਵੇਜ਼

ਫ਼ਤਹਿਗੜ੍ਹ ਸਾਹਿਬ: ਨਿਊਜ਼ਲਾਈਨ ਐਕਸਪ੍ਰੈਸ  –    ਸਰਹਿੰਦ ਰੋਡ ‘ਤੇ ਫਾਈਨਾਂਸ ਦੀਆਂ ਬਕਾਇਆ ਕਿਸ਼ਤਾਂ ਦੀ ਵਸੂਲੀ ਨੂੰ ਲੈ ਕੇ ਇੱਕ ਗੱਡੀ ਚਾਲਕ ਨੂੰ ਕਥਿਤ ਤੌਰ ‘ਤੇ ਰੋਕ ਕੇ ਗੱਡੀ ਦੀ ਚਾਬੀ ਖੋਹਣ ਦੀ ਕੋਸ਼ਿਸ਼ ਕੀਤੀ ਗਈ। ਗੱਡੀ ਚਾਲਕ ਅਨੁਸਾਰ, ਉਸ ਦੀ ਗੱਡੀ ਨੂੰ ਘੇਰਨ ਵਾਲੇ ਵਿਅਕਤੀਆਂ ਵਿੱਚੋਂ ਇੱਕ ਗੱਡੀ ਦੀ ਪਿਛਲੀ ਸੀਟ ‘ਤੇ ਜਾ ਬੈਠਿਆ, ਪਰ ਬਾਅਦ ਵਿੱਚ ਉਹ ਬਾਹਰ ਆ ਗਿਆ।
ਪੀੜਤ ਅਨੁਸਾਰ, ਉਹ ਆਪਣੀ ਪਤਨੀ ਨਾਲ ਜਾ ਰਿਹਾ ਸੀ ਕਿ ਇੱਕ ਕਾਰ ਵਿੱਚ ਸਵਾਰ ਕੁਝ ਵਿਅਕਤੀਆਂ ਨੇ ਸਰਹਿੰਦ ਰੋਡ ‘ਤੇ ਉਸ ਦੀ ਗੱਡੀ ਰੋਕ ਲਈ। ਉਨ੍ਹਾਂ ਨੇ ਨਾ ਤਾਂ ਆਪਣਾ ਕੋਈ ਪਛਾਣ ਪੱਤਰ ਦਿਖਾਇਆ ਅਤੇ ਨਾ ਹੀ ਫਾਈਨਾਂਸ ਕੰਪਨੀ ਵੱਲੋਂ ਦਿੱਤਾ ਕੋਈ ਅਧਿਕਾਰਤ ਦਸਤਾਵੇਜ਼ ਪੇਸ਼ ਕੀਤਾ। ਇਸ ਦੌਰਾਨ ਗੱਡੀ ਦੀ ਚਾਬੀ ਖੋਹਣ ਅਤੇ ਗੱਡੀ ਆਪਣੇ ਕਬਜ਼ੇ ਵਿੱਚ ਲੈਣ ਦੀ ਕੋਸ਼ਿਸ਼ ਕੀਤੀ ਗਈ।
ਇਸ ਘਟਨਾ ਤੋਂ ਬਾਅਦ ਗੱਡੀ ਚਾਲਕ ਨੇ ਪੁਲਿਸ ਹੈਲਪਲਾਈਨ ‘ਤੇ ਫੋਨ ਕਰਕੇ ਮਦਦ ਮੰਗੀ। ਪੁਲਿਸ ਦੇ ਪਹੁੰਚਣ ਉਪਰੰਤ ਦੋਵੇਂ ਧਿਰਾਂ ਥਾਣੇ ਪਹੁੰਚੀਆਂ। ਪੀੜਤ ਮੁਤਾਬਕ, ਪੁਲਿਸ ਨੇ ਦੂਜੀ ਧਿਰ ਨੂੰ ਤਾੜਨਾ ਕਰਦਿਆਂ ਕਿਹਾ ਕਿ ਉਨ੍ਹਾਂ ਦੇ ਇਲਾਕੇ ਵਿੱਚ ਅਜਿਹੀ ਘਟਨਾ ਨਹੀਂ ਹੋਣੀ ਚਾਹੀਦੀ। ਇਸ ਤੋਂ ਬਾਅਦ ਉਸ ਨੂੰ ਅਤੇ ਉਸ ਦੀ ਪਤਨੀ ਨੂੰ ਵਾਪਸ ਜਾਣ ਲਈ ਕਹਿ ਦਿੱਤਾ ਗਿਆ ਅਤੇ ਬਾਅਦ ਵਿੱਚ ਦੂਜੀ ਧਿਰ ਵੀ ਚਲੀ ਗਈ।
ਗੱਡੀ ਚਾਲਕ ਨੇ ਮੰਨਿਆ ਕਿ ਉਸ ਦੀਆਂ ਕੁਝ ਫਾਈਨਾਂਸ ਕਿਸ਼ਤਾਂ ਬਕਾਇਆ ਹਨ, ਪਰ ਉਸ ਦਾ ਸਵਾਲ ਹੈ ਕਿ ਕੀ ਕਿਸ਼ਤਾਂ ਬਕਾਇਆ ਹੋਣ ਕਾਰਨ ਕਿਸੇ ਨੂੰ ਸੜਕ ਵਿਚਕਾਰ ਗੱਡੀ ਘੇਰਨ, ਚਾਬੀ ਖੋਹਣ ਜਾਂ ਬਿਨਾਂ ਪਛਾਣ ਦੱਸੇ ਗੱਡੀ ‘ਤੇ ਕਬਜ਼ਾ ਕਰਨ ਦੀ ਕੋਸ਼ਿਸ਼ ਕਰਨ ਦਾ ਅਧਿਕਾਰ ਮਿਲ ਜਾਂਦਾ ਹੈ?
ਪੀੜਤ ਨੇ ਦੱਸਿਆ ਕਿ ਜਿਸ ਕਾਰ ਵਿੱਚ ਉਕਤ ਵਿਅਕਤੀ ਆਏ ਸਨ, ਉਸ ਦਾ ਨੰਬਰ PB 11 AB 8600 ਹੈ। ਉਸ ਅਨੁਸਾਰ, ਥਾਣੇ ਵਿੱਚ ਉਸ ਦੀ ਕੋਈ ਲਿਖਤੀ ਸ਼ਿਕਾਇਤ ਦਰਜ ਨਹੀਂ ਕੀਤੀ ਗਈ ਅਤੇ ਨਾ ਹੀ ਉਸ ਨੂੰ ਕੋਈ ਸ਼ਿਕਾਇਤ ਜਾਂ ਡਾਇਰੀ ਨੰਬਰ ਦਿੱਤਾ ਗਿਆ। ਇਸ ਘਟਨਾ ਨੇ ਵਾਹਨ ਫਾਈਨਾਂਸ ਕਰਵਾਉਣ ਵਾਲੇ ਲੋਕਾਂ ਦੀ ਸੁਰੱਖਿਆ ਅਤੇ ਰਿਕਵਰੀ ਦੇ ਤਰੀਕਿਆਂ ਬਾਰੇ ਸਵਾਲ ਖੜ੍ਹੇ ਕੀਤੇ ਹਨ। ਫਾਈਨਾਂਸ ਦੀਆਂ ਕਿਸ਼ਤਾਂ ਬਕਾਇਆ ਹੋਣ ‘ਤੇ ਵੀ ਵਸੂਲੀ ਲਈ ਕਾਨੂੰਨੀ ਪ੍ਰਕਿਰਿਆ ਅਤੇ ਨਿਯਮਾਂ ਦੀ ਪਾਲਣਾ ਜ਼ਰੂਰੀ ਹੈ।

Newsline Express

Author: Newslineexpres@1